TVB綜藝歌唱真人騷《中年好聲音》，逢周日晚九點半於翡翠台播映，由車婉婉擔任主持，聖誕繼續有《中年好聲音》睇，Keep住團火唔好畀佢熄！

上回合5燈選手周吉佩今次表現失準。
周日（25日）晚一集，繼續進行第二部曲《挑戰！兩個只能活一個》，將有19名選手出場，當中更有4位勇奪5盞燈佳績。上回合嘅其中一位5盞燈得主周吉佩（吉吉），是集因一個匪夷所思決定，搞到大家𢱑晒頭！事緣選唱炎明熹《複雜》嘅吉吉，由於表現失準需接受台下選手挑機，但吉吉竟然出乎意料地揀實力者「小龍女」龍婷做對手，嚇到全場O晒嘴，伍仲衡直言：「做咩揀佢，你自殺咩！係咪想唔玩呀？」肥媽則拋出一句：「你都Short Short哋！」

佢仲「自殺式」揀咗「小龍女」龍婷接受挑機。肥媽同伍仲衡都鬧周吉佩錯晒！
龍婷於2017年稱霸旺角行人專用區，2019年時參加央視舉辦嘅《星光大道》，勇奪該年度總冠軍，龍婷以鄧麗君腔見稱，今集獻唱張惠妹嘅《我最親愛的》，到底能否挑戰成功？吉吉又點解好揀唔揀揀著實力者龍婷？呢個星期日自有分曉。

實力者龍婷除咗一早已經稱霸咗旺角行人專用區之外，2019年仲贏咗央視舉辦嘅《星光大道》年度總冠軍。
是集觀眾較為熟悉嘅選手分別有李玟胞姐李思林、陳欣健女兒陳早怡及鄺文珣老公應德榮。李思林選唱《明星》，並透露呢首係妹妹李玟最愛嘅一首歌：「CoCo（李玟）開演唱會永遠都會唱呢隻歌，因為佢從來冇見過爸爸，佢唱呢首歌好似同爸爸講『我依家喺台上表演喇』。」

李思林唱《明星》送畀妹妹李玟，希望一直可以做妹妹嘅星星，言辭相當感人。

李思林特意改咗部分歌詞，藉此向妹妹盡訴心中情，佢哽咽：「我哋細個好艱難，成日見唔到媽媽，因為佢要搵食養大三個小朋友。我哋遭人白眼時都會一齊望住啲星星，今次揀呢首歌，係想話畀佢（李玟）聽我想做佢嘅星星。」

陳早怡獻唱莫文蔚嘅《愛》獲肥媽稱讚唱得有感情。陳早怡感謝爸爸陳欣健無時無刻給予她全力支持和鼓勵。陳早怡自封「高敏」人士，好易唔開心同好自卑。

46歲陳早怡自封「高敏」人士，佢接受製作組訪問時透露：「我個人好易唔開心、好自卑，覺得自己唔係好適合唱歌同幕前工作，屋企人都知我性格好敏感，擔心我承受唔到負評，但係爸爸任何情況只係同我講『I Love You』、『I Support You』，好多謝佢哋嘅關心。」陳早怡獻唱莫文蔚嘅《愛》獲肥媽稱讚唱得有感情。

應德榮揀選咗評審嘅作品嚟到獻唱，到底係利多於弊定弊多於利？52歲應德榮則獻唱陳曉東嘅《這種年紀》，該歌作曲者正係評審之一嘅伍仲衡。到底以上三人可唔可以憑住好聲音成功晉級？記得留意新一集！
《中年好聲音》逢周日晚九點半翡翠台播映。

TVB歌唱真人騷《中年好聲音》10強選手，呢個星期要揀「輝黃金曲」出戰，是集歌單為吳大強《L.O.V.E.》、丁文俊《網中人》、李佳《上海灘》、顏志恒《摘星》、龍婷《焚心以火》、涂家堯《當年情》、林鉫徫《問我》、羅啟豪《奮鬥》、支嚳儀《愛定你一個》及周吉佩《畫出彩虹》。

吳大強因手慢未能挑選心水歌《上海灘》，手速輸咗畀後輩，原來周吉佩都唔夠手快，佢被顏志恒搶心水歌曲，周吉佩自認揀歌好差，希望改編歌曲《畫出彩虹》想出奇制勝，而顏志恒則想找一位能駕馭嘅歌，令自己增加信心；支嚳儀經過低谷後，佢唔再夾硬去唱慘情歌，揀咗開心歌《愛定你一個》。

龍婷則想唱廣東歌求突破，努力提升自己，羅啟豪覺得對手實力相近，目前大家得分差距好細，而且評審俾分開始手緊，舒文作為今集嘉賓評審，坦言好難挑剔選手表現，舒文較為著重深層情感表達。