賀年有新歌|歌手齊集錄賀年新歌 《黃貔財神到》祝財源滾滾來

年年賀年歌都一樣聽到悶?今年 周志康 伍富橋 謝東閔 谷婭溦 施匡翹 同《聲夢2》嘅 彭家賢 金永衡 ,早前就一齊為一首全新應節賀年歌《黃貔財神到》錄音喇,不過當中急口令一樣嘅歌詞,就考起咗閔大人喇,佢仲話希望新一年工作順利呀。

而Alvin同阿康就以特別搞鬼嘅聲線錄音,希望大家更能夠感受新年氣氛呀,而舊年成婚嘅Alvin今年首次以人夫身份過年,佢就話要向阿康請教經驗,亦話最緊要慷慨開心,大家互相祝福呀。阿康仲教路叫Alvin快啲生小朋友,咁以後過年就一定可以幫補返多少喇。

至於溦溦同Zaina都係第一次錄賀歲歌,但係廣東歌詞就令溦溦要用多啲時間研究喇,而Zaina就話希望大家聽完呢首歌新年有新開始,希望帶到開心氣氛俾各位呀。

Zayden同金仔就非常開心有份參與錄音,佢哋仲話自己性格夾晒新歌,仲話今次有份直情好似升呢一樣呀。

 相關推薦