J2 節目《鋪鋪Poker》今晚一集嘉賓係豹哥 單立文，曾經喺電影《賭俠》中扮演大奸角「侯賽因」嘅佢，賭術精湛鋪鋪幾百萬上落。戲中仲有無數經典對白，侯賽因奸笑對住劉德華講「開嚟見我『吐啤』，想偷我雞？」，呢幕亦會喺節目會重現。
豹哥亦交足戲化身候賽因，一現身就同Poker教父 Ricky講笑話「幫我換廿萬美金先」。節目一開始，豹哥就澄清戲中同劉德華、周星馳鋪鋪幾百萬上落嘅戲份，佢話︰「其實真實生活 我冇賭運，啲人以為我賭術好叻，其實我好渣同個心好怯，唔夠膽贏錢㗎。」參與節目更係佢首次玩Texas Poker。
主持 郭偉亮 話自《鋪鋪 Poker》節目一開始，就想請豹哥做嘉賓，仲話豹哥多年來對音樂嘅熱誠非常值得尊重︰「唔止對佢音樂造詣崇拜，通常做音樂嘅人都好serious，但係豹哥好有幽默感。 佢拍《愛·回家之開心速遞》同拍《賭俠》侯賽因嘅角色好經典，想睇佢同賭枱嘅啤牌再發生關係。」
而原來幾位J2ers都對「候賽因」一角印象深刻，仲估不到第一鋪，豹哥就重現同劉德華對決嘅場面。當時牌局只剩低豹哥同 胡美貽 ，豹哥手上嘅牌正好同枱上啤牌組成「吐啤」。最終佢可唔可以因而擊敗 Nicole，就要留意節目播出喇。
豹哥又話平時多數都係打麻雀消遣，又笑言敢輸唔敢贏，因為贏咗嘅錢唔識處理。又自爆有過瘋狂歲月，試過有年幾兩年的時間，每日都係傍晚6點半播新聞時段先起身，佢話︰「嗰時興 Rave Party，日頭瞓，夜晚就去玩。啲腳有LMF、謝霆鋒、何超儀，玩完一個場仲唔夠，玩到最後一個場，磨爛蓆仲周圍問人有冇第二個場。」
差唔多每日都係「見光死」，玩到朝早先返屋企。而老婆胡蓓蔚不厭其煩，以「煩音」勸豹哥「唔好咁夜瞓」，豹哥最後都聽老婆話，不過對於呢段時光「同以前啲腳傾起，都好有回 憶」。