廉政狙擊｜定欣掟蛋糕同親母群姐反面 陳楨怡運毒被捕王浩信出手照護

個案同人物關係千絲萬縷嘅《廉政狙擊》，16號播出嘅重頭戲，一定係屠敏怒掟蛋糕拒與親母相認嘅一場喇，飾演屠敏嘅 胡定欣 同飾演其母群姐嘅 黎燕珊 演技大對決。自知道屠敏就係親女洛子欣後，群姐千方百計想同對方重修舊好，不惜整病自己之餘，又親製蛋糕往屠敏 Office求和，但係就因為搞錯女兒口味，令原本已經心軟嘅屠敏不屑吐蛋糕，仲將心中恨意灌注忌廉潑向群姐。

怒極嘅屠敏最終怒掟蛋糕，又指責群姐當年冧樓時見死不救，令原本仍對母女關係抱有希望嘅群姐極之慚愧，當正以為母女關係陷入冰點難以挽救時，原來一切都係屠敏「愛的計算」。

以上幾場戲都係定欣大晒功架之作，由見到母親親臨office冷若冰霜、到見到對方連叉都用盡心思即時雙眼通紅、再見到「錯味」蛋糕內心糾結又委屈、之後按捺不住含恨撥cream、再怒極爆發爆出一句：「鍾意食藍莓蛋糕嗰個係你個仔唔係我！」，然後邊落淚邊向母親清算舊賬，再送走母親，喺得力助手Vani( 蔡潔 飾)面前真情剖白，每一個細緻變化均演得絲絲入扣。

同場鬥熟練嘅 黎燕珊 一樣表現突出，無論係病態、擔憂、求和、內疚同失去希望等表情都演繹出色，尤其當女兒提醒自己，當年先救兒子嘅殘忍時，群姐嘅崩潰同真摯眼淚亦同樣感人。 

好戲連場亦令觀眾大為感動，定欣事後亦坦言兩場戲都係自己最愛嘅場面：「呢場掟蛋糕嘅戲同之後我同蔡潔講心底話嘅戲，兩場戲我都好鍾意，希望觀眾同樣喜歡！」而另一重點就係雪雪( 陳楨怡 飾)「頹」爆回歸，之前喺韓國做生意遭騙盡家財嘅佢，返港重建生活但又被騙運毒，最終被拘捕。眼見雪雪落得如此下場，嘅阿明( 王浩信 飾)大為心痛，仲對其照顧有加，二人戀情漸見曙光。不過今晚劇情又將有重大轉折，雪雪將會遇上車禍，明仔則墮樓重傷，到底佢哋係被設計陷害，定係另有內情？

《廉政狙擊》星期一至五晚21:30 翡翠台