全年無休每晚都為觀眾帶嚟笑聲，務求每集都為觀眾送上驚喜嘅《愛‧回家之開心速遞》，年初五晚將會為大家送上兔年首個驚喜，出道以來人氣有增無減嘅《聲夢傳奇》第一季總冠軍「傳奇新星」Gigi炎明熹將登場客串演出，Gigi喺劇中將做返自己，又會引發連串事件，聽晚(26號)記得留意喇。

Gigi客串《愛．回家》演出，令佢覺得非常有趣
自言由小學開始已經係《愛‧回家》捧場客嘅Gigi，對首度獲邀參與演出，就坦言非常興奮喇，佢話：「我一路都有追開，如果時間許可，我會準時八點鐘坐喺電視前睇，佢哋嘅內容令我睇完之後好開心，每集又會帶出一啲信息，好生活化。呢個處境劇我由細睇到大，小學時係《八時入席》，後尾又有唔同系列。」

Gigi劇中會做返自己，但係又引發出連串事件
Gigi指可以同劇中角色真正合作，感覺既榮幸又夢幻：「真係不可思議，冇諗過以前甚至依家仲一直睇緊嘅劇，會有機會遇到佢哋(劇中角色)，雖然有時喺TVB會遇到大家，但唔會真係話傾偈嗰種。」

同《愛．回家》嘅各位演員合作，令Gigi覺得非常夢幻
自言最尊敬角色「根叔」劉丹嘅佢，又非常希望有機會同對方合照：「我知佢做咗好耐，好開心可以加入呢個大家庭，因為我見到佢哋好似屋企人咁相處，又會互相叫對方阿爸、家姐或者阿妹，然後佢哋亦都好照顧我。」

搵到根叔合照就令Gigi最開心喇
Gigi今次參與演出之後，仲大讚劇中道具相當像真：「我覺得有個好得意嘅地方，我一直以為新威龍廣場係一個真嘅廣場，然後Key個名落去，後來先知原來係一個廠景，我覺得好神奇，同埋入面啲產品同店名都好得意。」

劇中場景令Gigi覺得非常有趣
仲趁空閒時間周圍探險

Gigi又話希望日後可以再多啲拍劇，因為非常鍾意同幕後工作人員相處，Gigi話：「我一直好想拍劇，我覺得拍劇好有趣，我好鍾意同工作人員相處，佢哋真係非常之好，好似屋企人咁，所以我希望儲多啲經驗同能力後再拍劇。」

講說話充滿童真嘅Gigi，又笑說拍攝當日遇到兩名相當可愛嘅小朋友，還送上兩粒朱古力氹小朋友開心，佢興奮咁話：「嗰日誤打誤撞帶咗兩粒朱古力，其實原本我係想試吓個味，因為冇食過，最後我就一人一粒請佢哋食，啱啱好，Yeah！」 

《愛．回家之開心速遞》星期一之日晚 20:00 翡翠台