今晚播出嘅一集《鋪鋪Poker》除咗繼續有杜如風擔任嘉賓之外，主持 Eric Kwok 同 劉浩龍 仲搵嚟喺《新四十二章》有突出表現嘅 糖妹 擔任嘉賓。上集Eric同師兄爆出Helen「倫仔」花名由來，又彈佢過往做事唔上心。而聲言已改過自新嘅Helen今集洗頹風贏得「爛命倫」稱號喇。

師兄呢集再透露Helen另一花名「地獄黑仔倫」，師兄話︰「諗返起件事都好癲，有年新年賭錢玩『射龍門』，兩蚊一鋪佢輸成兩萬蚊(Helen在旁更正為18000元)。『煙King』買晒都撞柱。」而Helen就無奈話︰「輸到要一路寫借據落去，3千一張、6千又一張。」師兄形容當時場面非常嚴峻，大家都心諗「死喇，如果佢再撞追唔返，咁點呀」。 至於最後點收科，就要留意今晚節目喇。

射龍門都可以搞到寫借據，Helen嘅往事難怪令老友Eric同師兄形容為地獄黑仔王喇

Helen為 J2 主持嘅《解風東京》大受歡迎，下星期就會播出最後5集。但係原來當年佢初次做主持係臨時拉伕上馬。話說有次Helen被派到東京採訪時裝表演︰「嗰時我係做writer，係被迫上梁山㗎。公司阿姐派我去，話位主持未攞到working visa，要我頂咗佢啦，仲話做fashion show講一兩句嘢就得。」

但係返到香港，效果令阿姐非常滿意，仲二話不說再派Helen同一位導演合作拍攝旅遊節目《流行東京》，仲估唔到一炮成名，一躍而成為日本旅遊達人。 Helen話自己一直都抗拒出鏡，佢話︰「初初好驚，所以我從來都唔肯試鏡，覺得好驚個camera，唔知點解，可能做開幕後。到迫上梁山對住鏡頭，又okay喎。」

當Amber同欣茵笑佢怕醜時，兩位男主持就即場踼爆，Eric先發難話︰「佢平時吹水吹到呢……面皮厚過腳板底，當然冇可能驚camera。」師兄亦出手補充話︰「仲唔怕醜過啲artistes。」大家最後得出一個結論，相信同Helen已故父親；資深傳媒人兼電影宣傳主管；人稱杜 Sir杜惠東有關，節目話埋你知點解。

《鋪鋪Poker》星期六晚 21:30 J2

今個星期會播出最後5集《解風東京》，昨晚（21日）一集，「日本旅遊達人」杜如風（Helen）繼續不分晝夜狂行狂買，點少得搜羅特色美食！攝製隊玩轉東京車站，Helen率領幕後團隊去到東京火車站的鐵路便當屋，證明飯盒唔一定「頹」。

便當屋有超過200款日本各地鐵路便當選擇，還有熱賣排行榜。首位牛肉便當用山形牛同米；第二位則是青森三文魚親子便當；第三位就是東京主場的炸雞炒飯便當。當日，工作人員紛紛化身便當試食員，前後試咗10款，「開箱」兼開餐，更有極高評價。