RB周國賢英國分別開騷 6號喊完再喊歌迷大合唱

RubberBand 同周國賢近日分別展開世界巡迴演唱會，更一齊到近年吸引唔少人移居嘅英國開騷，好似RB就先後喺倫敦同曼城演出，倫敦一晚表演，甫開場就唱出《Dedicated To…》、《¿醒未?》、《豬籠墟事變》同《細街盃》等歌曲，而唱到《小涼伴》時，6號更即興將歌詞「今晚節目很多能共你痛快度過」，改成「今晚節目很多來聽RubberBand唱歌」，又同觀眾大合唱。

RubberBand又將最近推出嘅新歌《戀人日常(的直線抽擊)》帶到英倫天空下，6號仲公佈最新歌將收錄喺新專輯《JUNTOS》內，仲話希望屆時可以喺英國發售呀。

RubberBand近日先後喺英國倫敦同曼城舉行首次世界巡迴演唱會

6號又提到可以喺英國同歌迷見面花咗唔少努力，又特意為英國觀眾，唱出達明一派嘅《今天應該很高興》同方皓玟嘅《假使世界原來不像你預期》，6號又話：「其實個『明』字係好緊要嘅一件事，明白係RubberBand一直相信嘅一件事，好感謝你哋一直明白我哋、等待我哋，無論係坐14個鐘頭飛機，橫越咗兩個州分嚟到呢度，明白我哋嘅過錯明白我哋嘅不足，明白我哋一路走來係一隊點樣嘅人。」

6號之後唱出《挾持》前，略帶哽咽感謝當晚亦有到場欣賞；揀寫歌詞嘅黃偉文，6號話：「好正，我覺得今晚唱得好過紅館嗰幾晚，認真㗎，我啲同事叫我唔好咁大壓力，但我都唱錯咗一句Sorry Wyman。」

Wyman亦係呢晚座上客之一

今次作為RubberBand首個世界巡迴演唱會，6號坦言一路走來不易，由當初只係喺各大學校園做Tour，到2023年終於舉行世界巡迴，又話要感謝第一批到場見證第一次嘅觀眾。之後6號向台下觀眾表示要唱出最後一首歌，以免大家趕唔上尾班車，點知台下觀眾就紛紛起哄，但就唔係叫Encore，而係齊齊大叫「有車」，非常惹笑，令6號都戲言要創作一首名為《通宵車》的歌曲。

觀眾熱情唔願走，搞到6號話要作首新歌《通宵車》送俾大家喎

佢哋嘅第二站表演移師曼徹斯特舉行，第二場依然有唔少感動場面，6號更淚腺連番失控淚灑台上。當唱出《假使世界原來不像你預期》時，見到台下燈海時就情緒失守淚崩，隊友泥鯭見到6號哽咽就接力繼續唱，台下觀眾亦高呼「加油呀！唔好喊！」6號之後收拾情緒繼續唱，但到副歌時又再次哽咽，而今次就到台下觀眾接力唱，場面感人。

大合唱過後6號有感而發表示：「感謝千里外嘅你哋明白我哋，償論我哋有幾多甩漏、喊，咁多年走來，你哋都聽我哋嘅音樂，可能喺香港嘅音樂會你哋未必睇到，但我哋應承咗大家，說了再見就會再見，嚟到呢度。」佢仲承諾兩年後再次重返曼徹斯特。

完成兩場英國站演出後，佢哋下站將轉往德國，而阿偉就話自己仍處於開心同興奮狀態喇：「我哋兩年前喺紅館約定再見，呢幾日嚟到英國，大家真係可以再見返，尤其感動同親切。當中最難忘係有一個部份，我同6號、阿正都有落台同觀眾近距離接觸，觀眾同我哋握手握到好實，感覺就好似同一啲分開咗一段時間嘅朋友大力擁抱，感受好深刻。所以，希望嚟緊盡快落實北美同台灣等World Tour分站，同更加多觀眾再聚，大家要等我哋嘅好消息！」

而同樣喺曼徹斯特舉辦嘅周國賢首次世界巡迴演唱會亦揭開序幕，現場氣氛反應熱烈，去年9月首度踏上紅館舉辦個唱嘅佢，音樂會一開始，周仔就以《失散時光》揭開序幕，跟住陸續唱出《天馬行空》、《不敵》、《今生不回家》、《地下街》、《陽光燦爛的日子》等歌曲，為歌迷帶來窩心嘅表演。

周國賢同樣正於英國舉行巡迴演出

之後喺觀眾熱烈呼聲之下，佢又詢眾要求唱出《黃金入球》，又即席同女歌迷合唱《目黑》，仲有女歌迷高呼：「周國賢，我愛你！」，搞到近日疑似爆出新戀情嘅周仔笑稱：「好彩你唔係同男朋友嚟睇！」，周仔最後以《Children Song》結束呢場表演，下一站將轉往倫敦。

入行19年嘅佢仲話時光一轉眼就過，多謝歌迷一直支持

周國賢事後話：「舊年喺香港首次舉行紅館演唱會，好多朋友因為移民冇辦法見證，對我嚟講，係我嘅遺憾多過佢哋遺憾，所以我就決定將演唱會帶去唔同國家，首站先到英國。」明年出道20周年嘅佢又提到：「時間過得好快，《14天》派台好似噚日嘅事，一眨眼就19年，能夠舉辦第一次海外演唱會真係唔容易。」佢仲話希望日後可以喺長大嘅紐西蘭、媽媽居住嘅新加坡、台灣等地延續呢次巡迴演唱會旅程。