魯振順3年前重遇逾40年前冇見嘅女同學Julie，二人譜出黃昏戀，原本有意於2022年10月喺主題樂園舉行婚禮準備造人生B，不過今日傳出66歲魯振順已打消結婚念頭！

魯振順與Julie受疫情影響，婚事一再延期，今日有報道指魯振順疑黃昏戀觸礁，魯振順回應傳媒時大方承認取消擺酒呢個念頭，一來主題公園費用昂貴，唔想親友舟車勞頓，二來佢呻Julie係控制狂，猶如阿媽般事事管，令單身多年嘅魯振順有啲招架不住。

魯振順以「老母」稱呼Julie，斬釘截鐵否認分手傳聞，佢同Julie目前以「老伴」關係相處，魯振順原打算待新居入伙後展開同居生活，不過魯振順坦言Julie要求嚴謹，至今仍未收樓！

魯振順與比佢年輕6年嘅Julie，當年相遇後佢哋未拖手仔已認定對方，拍拖短短四個月即計劃閃婚，魯振順更帶女友去珠寶店準備嫁妝，魯振順當時透露Julie正努力用中藥通經，而自己亦會去驗精，為生B做足準備，目前忽然傳出二人感情觸礁，未知佢哋呢個計劃有冇生變！？ 

由今晚起「鷲哥」呢個名已經out咗，要叫就要叫「天哥」！因為今晚開播嘅新劇《隱門》，吳岱融會喺入面飾演比鷲哥更狠更惡嘅賊王葉嘯天。
岱融哥今次演賊王葉嘯天。
之前喺《巨輪II》就已經為岱融哥打造出鷲哥呢個狠角，嚟到今次《隱門》，監製Amy姐王心慰笑言要為對方打造狠角天花板，所以度身訂造咗葉嘯天呢個十惡不赦嘅賊王角色畀岱融哥，Amy姐笑謂：「之前佢拍《巨輪 II》，我喺現場睇已經覺得佢表現超出我預期，然後我一直覺得佢有潛質再爆上去。」
個樣好兇狠。親生女都照打。
而據官方釋出嘅預告片，完全感受到天哥嘅「暴力美學」，唔理係劇中、由黃智雯飾演嘅親生女心月，定係一齊坐監嘅囚犯，只要一言不合天哥就會暴打對方，箍頸、撼頭埋牆、連環掌摑呢啲都係基本，其中一幕天哥喺服刑期間，發狂咬甩另一囚犯嘅耳仔，不過因為尺度問題，所以出街前就決定剪走。
據知呢幕太血腥所以剪走咗。離遠睇都係好可怕。
再次做狠角，岱融哥坦言有壓力：「成日要將個轉數Tune到好高，同埋真係打得比較多，所以有啲壓力，自己演繹呢個角色好多時係扯到行晒，好似睇咩都唔妥咁，係好玩嘅，但亦真係需要大量體力。」講到同之前「鷲哥」一角嘅分別，岱融哥話高天鷲係有錢嘅惡人，而葉嘯天就係冇錢嘅惡人：「因為冇錢佢發晒癲、不擇手段，仲要好喪。」岱融哥話劇中自己暴難忘嘅一場，係臨尾爭啲畀陳展鵬活埋嘅戲份，岱融哥話除咗係因為拍攝時好辛苦外，最重要係當日呢場戲佢嘅囝囝嚟咗現場，仲好認真咁幫佢影攝劇照，即刻令岱融哥覺得再辛苦都值得。
天哥成日都打人耳仔主意！呢個樣真係會令人心寒。
至於講到要應付劇中大量動作場面，岱融哥就話好在平日都有keep住鍛煉體能，又指監製 Amy姐好體恤，搵咗個替身畀佢，等佢有機會抖吓。

《隱門》逢星期一至五 20:30 翡翠台