王丹妮及陳星妤呢日出席一個藝術展活動，陳星妤憑《一舞傾城》而人氣急升，佢指KK呢個角色越拍越大壓力，只好不斷問導演、姚子羚及陳法蓉嘅意見，慢慢睇到自己有進步。

王丹妮以一頭短髮造型現身，佢笑指幾個月後將接拍新片，目前要積極留一頭長髮；同場仲有已故戴安娜王妃雙胞胎姪女Lady Amelia Spencer同Lady Eliza Spencer，王丹妮大讚二人好友善，好開心佢哋第一次嚟香港就見到面。

王丹妮（Louise）同羅孝勇（Sheldon）一星期前喺澳洲補辦完婚禮，夫妻新婚後隨即小別，Louise正身處多明尼加共和國準備拍攝外國電視劇，而Sheldon就趁住學校假期返回香港幫忙湊囡囡Affa，Louise話希望日後可以同Sheldon補返個度蜜月，又公開示愛話：「會掛住老公，因為嚟緊幾個月都見唔到面，好多謝Sheldon喺香港幫忙手照顧Affa，由拍拖到結婚佢都盡全力肩負起爸爸責任，係一位超過100分嘅好爸爸。」
 一家三口合照。

婚禮當日一對新人獲各方親朋好友遠道而嚟送上祝福，有《毒舌大狀》團隊電影監製何韻明、導演吳煒倫、《梅艷芳》導演梁樂民、演員黃溢濠和盧鎮業（小野）、服裝指導葉嘉茵，而廖子妤同高海寧更擔任Louise嘅姊妹團。Louise話：「雖然只係補辦婚禮，但感覺上同正式結婚一樣咁幸福，流咗好多開心又感動嘅眼淚，多謝咁多親友咁遠嚟一齊慶祝，係個難忘美好回憶。」喺晚宴上Sheldon更多次感動落淚，尤其講到感謝父母悉心教導、令佢學識愛情嘅模樣、夫妻相處之道等。Louise認為最感動同浪漫係二人跳舞時，因為不需要任何言語，成個世界好似得返佢哋兩人一樣。
　左起 黃溢濠、導演吳煒倫、服裝指導葉嘉茵、廖子妤、王丹妮、羅孝勇、電影監製何韻明、梁樂民、盧鎮業

Louise同Sheldon結婚當日早上進行傳統中式婚禮儀式，下午喺教堂行禮時，Louise整個過程都好感動，佢話：「由媽媽拖着我同行，將我隻手交到Sheldon手中時，大家都已經眼濕濕，聽到媽媽細聲同Sheldon講『丹妮以後交畀你，你要好好照顧佢，我都放心』然後見到媽媽眼有淚光，我知道媽媽好恩惠、安心，所以我都好感動。當我哋互相對望宣讀誓詞幫對方戴上婚戒時，真係有執子之手與子偕老感覺。」
 Louise同Sheldon結婚當日早上進行傳統中式婚禮儀式，下午喺教堂行禮。

此外，Louise感激一班出心出力嘅姊妹團，無論係玩遊戲以及大小事務都非常主動幫忙，為婚禮花咗好多時間同心思，完全感受到滿滿嘅愛同支持，所以完成婚禮翌日就安排咗兄弟姊妹們去兩日一夜小旅行，同時亦係Louise同Sheldon小蜜月。