91歲劉兆銘（Ming Sir）近年深居簡出，大前輩劉兆銘演技出色為大眾認識及喜愛，喺圈中地位崇高，不過劉兆銘最近少咗公開露面，日前吳鎮宇與兒子Feynman一齊探望劉兆銘，今日黃秋生喺IG上載合照，原來當日佢同劉青雲都在場，眾人一齊敘舊。
相中見劉兆銘精神奕奕、帶微微笑容，其實黃秋生、青雲、達明及鎮宇於2017年亦有約Ming Sir見吓面，呢個絕對係鑽石級陣容嘅好戲之人。
Ming Sir以往舉行活動不時見青雲、達明及鎮宇前往撐場，呢日鎮宇與Ming Sir合照時，以雙手搭着Ming Sir嘅膊頭，劉兆銘一臉慈祥，可見TVB藝訓班出身嘅鎮宇，多年來與Ming Sir嘅關係亦師亦友。
Ming Sir年輕時前往法國習舞，成為首位為法國舞蹈家編舞嘅華人，舞而優則演，演而優則導，Ming Sir於1979年被徐克相中，邀請拍電影《蝶變》，Ming Sir正式踏入幕前工作，後來80年代簽名TVB，演出過多部劇，同時有演出電影包括喺《倩女幽魂》飾演樹妖姥姥。Ming Sir獲《舞蹈年獎》傑出成就獎，其後於《萬千星輝頒獎典禮2013》獲頒萬千光輝演藝人大獎，Ming Sir喺2013年獲港府頒發「榮譽勳章」，以表揚其對演藝文化界嘅貢戲。