陳奕迅嘅世界巡迴演唱會早前去到北美站，創下首個華人歌手喺北美Arena開六場演唱會嘅紀錄，亦係首位踏足San Francisco Chase Center 開show嘅亞洲歌手，而Chase Center更特別為Eason訂造一件刻上佢演出年月日嘅FEAR AND DREAMS黑色外套作紀念。
今次嘅巡迴演出，Eason坦言每一站都好難忘，加上有充足嘅休息時間，令佢有時間好好休息聲帶次餘，又可以感受當地城市，見下喺北美生活嘅舊朋友會面。Eason話：「其實我夜晚好少出街， 不過日頭有時間就去過睇網球賽，同朋友見下面聚下舊，冇諗過shopping，但竟然都買咗幾塊網球拍，係Chicago仲迷上左一樣新運動，叫做Pickleball，唔覺意又買咗幾塊拍。」
講到成為首位華人歌手於三藩市San Francisco - Chase Center演出， Eason就謙稱唔係咩特別事：「係咪第一個都唔係咩特別，我最緊要反而係觀眾睇得開心，明我個騷講緊咩，最開心係收到唔少歌迷睇完騷啲留言， 佢哋話入場聽到好多從來冇聽過嘅歌，冇《十年》，冇《單車》，冇咩咩咩......但演唱會完了發現嗰啲未聽過嘅歌都好好聽， 現在歌單之中都係我嘅『新歌』，我估佢哋係接收到個騷，呢個先係令我最開心。」
之前有傳Eason溫哥華站嘅演唱會飛賣得唔好，但當Eason見到全場爆滿時，佢笑言：「好多謝你哋， 之前話溫哥華啲飛係賣得最差，但係依家又唔係好覺喎，咪又滿晒，幾好嘢喎你哋！我知啦，係你哋慢，聽講你哋係慣咗買飛買得好慢，我差啲諗住咁不如取消咗佢啦。」
由於溫哥華係北美嘅尾場，所以安歌時Eason唱咗三首歌，令觀眾十分開心，之後佢又爆響口話自己就快會出新碟，Eason話：「錄咗好耐啦，隻碟同Fear and Dreams 好有關係， 好希望隻碟可以帶到力量俾大家，喺大家經歷過好多唔好嘅事、壓力同驚恐之後，可以一齊停一停，放鬆呼一口氣， 抬頭再望，原來重有路可以繼續行。」
