真BL組合「新田公路」推出第四支全新派台單曲《與青春說再見》，首歌由小新許紹燊一手包辦曲詞編監，曲中嘅鋼琴、小提琴、大提琴同口風琴都係由佢親自演奏。
講起呢首歌，小新表示自己創作呢首歌時正係自己人生最迷惘嘅時候：「寫呢首歌嘅時候，屋企經濟上出現巨大轉變，適逢我剛辭咗份正職，轉為夜場嘅全職歌手。見到身邊啲大學同學都結婚生小朋友，有穩定嘅收入，開始質疑自己嘅存在意義同價值。我嘅迷惘，就係成長，唔知點樣應對呢個世界。」
而喺田中田見超眼中就覺得呢首係道別歌，道別一個狀態，走向另一個階段，田中表示：「歌入面嘅青春唔係講緊年齡，而係一個狀態。以我為例，30歲前，儘管年紀同歷練增長咗，但係內裏仍然覺得自己停留喺17歲嘅高中時期，唔係話刻意唔想成長，而係生活中嘅環境、際遇，或者係一啲陰影，令到你覺得冇需要，或者冇能力跨過自己嘅17歲。」田中分享指自己當時聽到小新呢首嘅Melody時，自己正喺度插緊花，當時佢聽完後，田中就同小新講：「係你寫過嘅Melody最好聽嘅一首。」
