台慶劇《新聞女王》，即將喺翡翠台隆重登場，呢部已經正式展開宣傳嘅重頭劇集，今日亦透過社交平台公開六張主要角色嘅最新人物造型宣傳海報，包括「文家軍」文慧心( 佘詩曼 飾) 同徐曉薇( 何依婷 飾)，「佐治黨」梁景仁( 馬國明 飾)同許詩晴( 高海寧 飾)， 以及「中立派」張家妍( 李施嬅 飾)同劉艷( 王敏奕 飾)。
而海報嘅宣傳語句：「人生就如這棋局，從來沒有人能夠真正掌控時代，而那些玩弄時代的人也終將會被時代所淹沒」、「提醒女王們～棋局已佈置完成，執棋之人亦是棋子，究竟誰才是真正贏家呢？」意味住故事所圍繞嘅SNK電視台中，每日都有唔同辦公室博奕，每分每秒充滿變數之餘，邊個擺佈別人定係正被擺佈都難分清楚。
六位演員以新鮮感十足嘅維多利亞時代造型亮相海報，阿佘身穿全黑透視公主袖宮廷服上場，配以權威眼神同纖幼腰肢非常搶鏡；另外以超低胸寶藍色宮廷服造型上陣嘅高Ling，加上一身藍寶石首飾同樣係無點所在。而李施嬅同何依婷就分別以近似款式嘅白金造型亮相，王敏奕則以暗紅色造型出現各具美態。
五位女演員頭上都戴上唔同款式皇冠，以突出「女王」主題。 《新聞女王》總監製 鍾澍佳 受訪時，就直指鎖定維多利亞時代作為造型重點，係希望打造出貼題女王感：「我哋其實一開始就計劃要拍一個職業劇，新聞概念我相信觀眾都好清楚知道，剩番落嚟就係點樣將女王同戰場呢個概念、以更有視覺效果嘅方式呈現畀觀眾。所以我就同負責海報設計嘅同事Leo商量，用咗呢個Image。」
佳導指自己非常滿意海報效果，更坦言單係拍攝呢輯海報，台前幕後已花接近三日時間，足見製作團隊嘅認真。據知六位主角面前嘅「道具」亦各具意義，六人之中只有王敏奕面前沒有棋子，而只有一本打開嘅書籍，佳導被問到係咪寓意其角色清純時笑言：「都啱架，因為王敏奕佢係冇歸類，唔係任何人嘅棋子。」
至於其他角色設計意念，負責海報設計嘅Leo就補充：「阿佘面前除咗王后棋、其他棋都冧晒，代表住佢嘅霸氣。至於馬明成盤棋擺晒出嚟嘅意思，係想打造穩重同深思熟慮嘅感覺。施嬅面前有兩隻平排嘅棋，想畀人感覺佢好公平，打造正義感；至於依婷，我哋就想sell靚靚少女Feel，所以背景用咗玫瑰花。而高Ling面前嘅騎士棋就代表住衝鋒陷陣嘅感覺。」
