「咖啡達人」陳豪對咖啡好有研究，試過同Do姐拍旅行節目《晚間看地球》介紹土耳其咖啡文化，見佢煮咖啡溫度確係有自己嘅堅持，佢更創立自家咖啡品牌Blooms Coffee，原來陳豪開工亦會「開檔」沖咖啡畀劇組，仲要出動埋私伙，對沖咖啡過程真係一絲不苟！
陳豪日前喺內地拍TVB新劇《企業強人》就帶咗60包咖啡粉上去，李興華早前喺社交平台貼出影片，分享陳豪「咖啡檔」真面目，余思霆得戚指劇組每日都有咖啡飲，
畫面見陳豪有一個迷你咖啡檔有大熱壺、專業咖啡機及一桶蒸餾水，陳豪笑指淨係TVB廠先有，余思霆更指陳豪咖啡檔係無限添飲。
陳豪早排喺《豪遊咖啡》透露最初佢拍劇係會拎磨豆機去片場沖咖啡，而唔係用咖啡粉，不過佢考慮到磨豆啲聲太大，有機會影響拍攝進度，所以陳豪索性抬咖啡機去開工，當佢見到台前幕後飲得開心，就覺得遠勝自己飲咖啡嘅感覺，龔嘉欣都講過陳豪係會準備多款咖啡，記得陳豪喺橫店拍《金枝慾孽2》試過於酒店後巷炒咖啡豆及沖咖啡畀大家飲。
陳豪老婆陳茵媺當年亦係被一杯咖啡俘虜，佢哋緣於一杯咖啡，陳茵媺跟陳豪拍劇時試過拎住咖啡四圍走，有次服裝姐姐叫陳茵媺搵陳豪沖杯咖啡飲，陳豪就即刻出去整，即使陳豪婚後都每日為愛妻沖一杯專屬咖啡，味道偏香有朱古力味，陳豪果然係圈中愛妻號！