《新城勁爆頒獎禮 2023》於12月30號喺會展舉行，今屆口號係「…正在生成」，今年合共頒發68個獎，派發今年度樂壇首張成績表，出席歌手有馮允謙、Gin Lee、炎明熹（Gigi）、泳兒、JW（王灝兒）、詹天文（Windy）及《聲夢傳奇》學員等。
姚焯菲（Chantel）歌曲《這個姿態》MV推出5個月已有逾226萬點擊，今年憑《這個姿態》奪「勁爆新媒體歌曲」，Chantel更孖好友張弛豪一齊獲「勁爆躍進歌手」，Chantel連掃兩獎！
Chantel拎獎時先同大家講新年快樂，多謝公司、幕後團隊、屋企人及「小菲象」，好想多謝《這個姿態》監製同填詞人，一開始錄音有啲擔心，好多謝團隊幫忙完成呢首歌；而張弛豪就多謝經理人團隊，希望下年做唔同風格嘅歌，多謝愛佢嘅人同佢愛嘅人！
XiX一齊上台領「勁爆躍進組合」獎，XiX好開心第一次出席頒獎禮就拎到出道以嚟第一個獎項，佢哋多謝獎門人、公司團隊，同時多謝家人支持，最後佢哋多謝一直支持佢哋嘅Eric Sir，承諾會乖同畀心機做到Eric Sir嘅要求。