首屆頒獎禮表揚舞者熱血演出 Gin Lee ANSONBEAN獲頒舞蹈演出獎

嘉許本地舞蹈藝術嘅首屆《Figure OUCH! 2023年度頒獎禮・華麗舞蹈派對》日前圓滿舉行，當晚向業界傑出表演者一共頒發23個年度舞蹈獎項，創始人鍾舒漫 有份得獎嘅 李幸倪 同 ANSONBEAN 亦親物支持，加上現場200位參與表演嘅舞者，令氣氛熱血又熱烈。

呢晚大會共頒發9大項目23個獎項，各個獎項由提名至投票都貫徹零門檻、零篩選宗旨，所有獎項都由全民票選誕生，無論係舞台前方嘅歌手、演出舞者定係幕後編舞、導演亦被囊括其中。

首屆表揚圈內舞蹈表演者嘅頒獎禮日前舉行

獲選「年度MTV舞蹈演出」嘅 李幸倪 同 ANSONBEAN分別到場領獎。憑歌曲《Dum Dum》奪獎嘅Gin Lee受訪時話：「好開心、拍跳舞MV真係唔容易，背後有好多環節，好多大家睇唔到嘅準備功夫。呢個獎唔止屬於我，係屬於整個有份參與呢首歌嘅舞者同導演。慢歌要有好多情緒，件事好個人，但係跳舞要配合嘅嘢就多好多，我仲記得拍《Dum Dum》MV前嗰兩個月，我日日都去排舞排5個鐘。跳舞冇得呃，所以我好尊重每個舞者，用盡佢哋身體嘅力量去換演出時嗰份靚。」

Gin Lee又透露稍將再推出跳舞新歌：「今次行性感同型格路線，但係冇佢哋咁勁，而家操定啲肌肉，等隨時可以騷出嚟。」

Gin Lee因為《Dum Dum》而獲「年度MTV舞蹈演出獎」

而ANSONBEAN就憑《Get Wild》演出得獎，佢直言往後會推出更多舞曲：「我想做呢類 Club 歌好耐，嚟緊都會造多啲Dance同R&B。我好鍾意跳舞，因為自己個性格都比較衝動，跳舞就可以攞到個力度出嚟，好似平衡返自己咁。」

ANSONBEAN亦獲同一獎項加許

而身為主辦單位創始人兼頒獎嘉賓嘅Sherman，由去年嘅大型跳舞匯演到今年嘅頒獎禮，都話要感謝王君馨：「係王君馨話要有個頒獎禮，歌手、演員、廣告界都有頒獎禮嘉許，但係舞者就冇，所以我哋就搞個頒獎禮表揚返佢哋。」