本尊就位｜為奪初夜韋家雄潛入監獄 厲鬼陳嘉慧對戲死忍焗蟹

新劇《本尊就位》已經播出咗三集，過去兩晚劇情主要圍繞「溫香玉院」入面，陳嘉慧飾飾演嘅花魁雪花，以「盛夏初雪」之名賣初夜嘅故事。一心希望將初夜獻給文人雅士嘅雪花，計劃將初夜變成文藝比拼場，只要憑票入場並勝出賽事，便可得到雪花初夜。一直垂涎雪花美色嘅金士豪／金爺（韋家雄飾）以橫蠻手段收購所有入場券企圖獨佔雪花，點知中途殺出個「程咬金」雷石／呂洞賓（謝東閔飾），不過最終都係金爺順利勝出。
陳嘉慧飾飾演嘅花魁雪花賣初夜。韋家雄企圖獨佔雪花。
為保初夜，雪花扮厲鬼上身嚇退金爺，事件最終演變成殺人事件，雪花以嫌疑犯身份被捕入獄；急色嘅金爺為盡快得到雪花，竟然諗到同鎮內警察串通潛入監獄與雪花相好，雪花千鈞一髮之際諗到以「鬼影」奇招嚇退金爺，力保貞節。講到同家雄合作，Erica話獲益良多，但副作用係要忍笑：「好開心可以同家雄哥合作，佢係好資深嘅前輩，佢拍劇好有自己風格同節奏，仲要係好難模仿到，真係好值得學習。我都有聽過個個同佢合作拍戲都忍唔到笑，我同佢拍時都係咁，佢成日用氣聲嗌『雪花』（拉長尾音），仲要唔知點解啲對白同動作一經過佢，就即刻好有喜感。」
韋家雄同鎮內警察串通潛入監獄與雪花相好。
喺劇中角色自毁花容扮鬼一幕，Erica指「交叉疤痕」原來相當考功夫：「個交叉疤痕係要事前整好晒嘅，化妝同事好好、用咗好多時間研究點樣可以像真啲，因為每一次康復程度唔一樣，所以血嘅深淺都會唔同。有時現場拍拍吓個疤會突然跌落嚟要貼番上去、又或者還原番正常樣都好花時間，所以都好多謝大家成日咁有耐性咁去等我。」

Close Up疤痕「真身」。

Erica為咗扮鬼，足足大叫咗成晚：「我全程鬼叫咗成晚，叫到喉嚨都痛埋；因為要就角度，拍咗好多take。」官方今日（1日）釋出嘅NG片段，Erica同家雄演對手戲時錯漏百出，除咗講嘢走音，連環忘記對白兼講英文，令家雄哭笑不得。另外，Erica扮鬼望後怒吼一幕，因為家雄夾嚟夾去都捉唔準時間，結果令二人差啲真咀，家雄因而嚇到眼都凸，場面爆笑。另Erica仲喺個人社交網上載咗拍彈古箏場口同Close Up疤痕「真身」。
Erica為咗扮鬼足足大叫咗成晚。二人爭啲真咀。
飾演妓女杜鵑嘅劉嘉琪亦甚有發揮，因妒忌雪花獲特別待遇，杜鵑不但加以針對，仲將雪花「初夜」題目秘密賣畀金爺。而杜鵑離奇死亡，所有表面證供均指向雪花，因而引發連番風波。到底杜鵑之死同雪花係咪真有關係？就要收睇《本尊就位》喇！

《本尊就位》逢周一至五晚8:30翡翠台播映
飾演妓女杜鵑嘅劉嘉琪甚有發揮。