電影泉攻略丨Tom Holland或成《蜘蛛夫人》宇宙蜘蛛俠｜EP88

王鎮泉 Jeoffrey 每星期為你提供最熱辣電影資訊，中外猛片專訪花絮上映時間全部集齊，「電影泉攻略」每周四買定爆谷陪你睇新戲。

《SPY X Family》可以話係紅遍全球，周圍都可以見到佢哋嘅踪影，喺千呼萬喚下佢嘅劇場版終於都要上映喇！今次劇場版將會由動畫嘅副導演片桐崇執導，而本身動畫導演古橋一浩就會擔任顧問。故事舞台會由日常生活跳去冰天雪地，展開一場解決世界危機嘅家庭旅行。

新片速遞有《劇場版 SPY×FAMILY CODE: White》特務黃昏為咗保住飯碗，誓要令安妮亞喺伊甸學園嘅烹飪班入面奪得星星，於是提議製作傳統甜品，仲一家踏上首次家庭旅行，點知旅途中安妮亞發現一個裝住奇怪朱古力嘅行李箱，仲誤吞呢粒足以左右世界命運嘅朱古力！

《特工亞皆老》由《皇家特工》導演執導，講述【亞皆老 Argylle】系列小說作者，每日只係嚮往著同電腦同埋貓貓喺屋企渡過每個寧靜夜晚。點知佢嘅小說內容喺現實生活中發生，惹來了特工亞皆老同間諜組職關注，令佢嘅生活不再平靜。

好快就上映嘅《蜘蛛夫人》，作為蜘蛛俠宇宙嘅外傳電影，一直引嚟外界唔少猜測，亦有傳電影入面會出現蜘蛛俠嘅親生父母，但到底係邊一代嘅蜘蛛俠就未知喇。但因為有傳《蜘蛛夫人》設定嘅時代背景係上世紀90年代，後來突然要重拍，刪走晒90年代嘅鏡頭，改為喺2003年發生，大家就估係咪想搵較年輕嘅Tom Holland做呢個宇宙嘅蜘蛛俠呢？究竟係點就要等電影上映先有答案喇。

本周票房戰況截至1月31號中午，第3位係《蜂神惡殺》、第2位《潛行》、第1位就係《金手指》。