本尊就位丨謝東閔煩音版呂洞賓受讚賞 10度下與孔德賢黃建東拍淋雨戲

本尊就位丨謝東閔煩音版呂洞賓受讚賞 10度下與孔德賢黃建東拍淋雨戲

孔德賢同謝東閔喺劇集《本尊就位》,為咗拍攝1號晚播出嘅古井逃生戲,可以話係相當大犧牲!佢哋除了要花大量力氣諗辦法以背對背形式爬出古井外,更要全程浸喺水入面,而最令人難忘嘅,謝東閔雖然跌咗落井底,但仍然瘋狂說教,搞到佢硬食大量人造雨,頭髮仲因為濕晒而變成「比達Look」,相當爆笑。至於同喺井底嘅孔德賢,雖然唔使應付咁多對白,但被人造雨瘋狂「襲擊」嘅佢,搞到面容扭曲雙眼都睜唔開,十分誇張。
孔德賢被綁掉落井底。
謝東閔受訪時,坦言井底戲拍足兩日,並透露同孔德賢嘅「二人四足攀井」場口,係喺棚架、威也及動作替身幫助下完成拍攝,佢話:「呢場戲差唔多臨尾聲先拍,嗰時已經開始變凍,落水都真係幾凍。我哋嗰場係吊威也,同埋搭咗個好大嘅景,都拍咗兩日㗎。」
煩音謝東閔淋住人造雨都不忘說教。
是次謝東閔飾演嘅「煩音」呂洞賓相當出位兼入屋,佢受訪時坦言有被古文考起:「啲古文真係背得好辛苦,呢套係我拍咁多套背得最多古文嘅一套戲,有啲仲要我自己都未必好明,所以都要花好多時間研究。」雖然呂洞賓「煩到冇朋友」,但正正因為「做乜都錯」,反而成功入屋,有網民留言笑指謝東閔角色係「戇居得嚟幾好笑」,對此東閔笑言:「係呀,我自己就設計咗神仙同凡人有代溝呢個位出嚟,咁樣希望出嚟效果搞笑啲,好多謝網民睇得開心。」
謝東閔嘅演出得到網民讚賞。
另外,黃建東亦喺社交網補充,指拍攝呢場戲時,當晚只得十度,雖然拍得辛苦,但佢笑言 Enjoy,皆因好鍾意自己個悲情角色:「拍戲永遠都係咁,平時又唔見咁凍,到拍嗰日半夜超凍,好似得 10 度,我嗰陣又唔識得用保鮮紙打底,一路跪喺泥地一路打住冷震咁講對白。」
黃建東指拍攝當日得10度。飾演傻姑嘅梁珈詠情緒非常到位。
除咗主角,《本尊》配角亦甚有發揮,劉嘉琪飾演嘅杜鵑,佢嘅死亡事件目擊證人傻姑梁珈詠,喺2分半鐘嘅演繹入面明顯花盡心思,除咗刻意以小孩 tone 講對白,眼神亦相當孩子氣。其中一幕邊憶述杜鵑被殺經過、邊嘟嘴撒嬌及企圖推開雪花(陳嘉慧飾)隻手作自我保護,更加睇得出珈詠已完全進入狀態,講到激動處時仲會眼泛淚光。有「御用師奶」之稱嘅「大頭妹」梁珈詠,入行 24 年演過劇集 超過 100 套,直到前年終憑參加《全能司儀選拔大賽》打開知名度,當年珈詠喺節目中一句勵志 bite:「我都真係仲有堅持緊」感動唔少觀眾。

《本尊就位》逢星期一至五 20:30 翡翠台

梁珈詠嘅演出超讚。梁珈詠嘅演出超讚。

本尊就位丨謝東閔演囉嗦呂洞賓勁似「唐三藏」 雪花身世曝光因暗戀呂祖被貶凡間

下周進入結局周嘅TVB劇集《本尊就位》,驚喜劇情一浪接一浪。由於呂洞賓被「金翅忘記鳥」喚醒被封印嘅記憶,從而得知雪花真身係「牡丹仙子」,當年牡丹仙子為咗幫呂祖消滅穿山甲妖,不惜偷去王母娘娘(程可為飾)髮簪,最終因觸犯情誡被貶落凡間經歷十世情劫……得悉真相後內疚不已嘅呂祖,為咗贖罪不但願意還俗五十年還雪花一生幸福。

謝東閔同韋家雄齊齊獲封全劇最出色演員。牡丹仙子因為愛上咗呂洞賓走去偷王母娘娘嘅髮簪。

為咗做個負責任嘅男人,先後喺街邊擺檔兼與木昆(孔德賢飾)求取工資,令呂祖、雪花及木昆之間嘅「人仙三角戀」再添變數……另邊廂,木昆仇人利大爺(煒烈飾)抵達五族房鎮,並誓要當眾揭破木昆神棍身份,就喺千鈞一髮之際,木昆之前藉住藏寶圖尋獲嘅髮簪發揮神力,成功穩住木昆大仙身份;由於髮簪與當年封印穿山甲妖嘅髮簪十分相似,一場前所未有嘅腥風血雨似乎即將來臨……

牡丹仙子因而觸犯情誡被貶凡間經歷十世情劫。呂洞賓得悉牡丹仙子為自己犧牲咁多,即刻盡力向其今世身份雪花作出愛的呼喚。呂洞賓仲願意為咗補償雪花還俗五十年。

其實謝東閔今次飾演呂洞賓確實相當有趣,堅守「仙道」嘅佢經常滿口仁義古文,顯得既脫節又囉嗦,係劇中重要笑料來源;而東閔嘅喜劇節奏亦比之前有明顯進步,全程「搭錯綫」狀態讓人又愛又恨。對於東閔轉型做「囉嗦仙人」,網民大為受落,除咗讚佢演技有進步,更將佢與韋家雄並列為全劇最出色演員。

呂洞賓被「金翅忘記鳥」喚醒被封印的記憶。韋家雄呢個惡霸金爺,前晚呢幕爆 Seed 打爆區明妙都幾乞人憎。雖然鏡頭前作惡多端,但鏡頭背後嘅韋家雄係眾人開心果。

另有網民指謝東閔角色有電影《西遊記》系列中唐三藏(羅家英飾)影子。喺劇中與謝東閔有不少對手戲嘅樊亦敏,亦對其讚不絕口:「我同東閔有合作過,佢不嬲好努力嘅,係抵讚嘅。佢份人好直來直去,私下就好柔情、對動物好好,亦都好好笑,今次見番佢我覺得佢笑多咗。佢演呢個角色係成熟咗,佢好多古裝台詞,都難嘅。佢有啲手勢好似抱拳咁,我都有畀啲意見,希望令佢個角色更加好玩。」

木昆的神棍身份經常處於曝露邊緣,之前靠「金翅忘記鳥」已逃過一劫。

至於同獲熱捧為劇集MVP嘅韋家雄,除咗幕前演出連續三個星期贏盡正評,有網民更直指《本尊》係韋家雄代表作,讚韋家雄係出色演員,做壞人又唔乞人憎,節奏十分好,又有喜劇感,造型又可愛,而劇中差唔多每位演員亦對韋家雄讚不絕口,大讚佢係一等一開心果,更笑指佢相當「提神醒腦」,每次拍通宵戲只要遇上韋家雄,必定被佢超級爛gag笑到「成個人精神番」!

木昆今次再靠神力髮簪再逃過利大爺挑機,不過整件事背後似乎有暗湧!

《本尊就位》逢周一至五晚八點半翡翠台播映 

 相關推薦

熱門搜尋