狀王之王丨 姚子羚再化超醜妝爆笑出巡 查神秘失蹤案驚見鬼新娘?

狀王之王丨 姚子羚再化超醜妝爆笑出巡 查神秘失蹤案驚見鬼新娘?

TVB劇集《狀王之王》噚晚(2號)呢集新個案「幽靈新娘案」展開,劇情講述富家千金林惠敏(鄧伊婷飾)結婚之日離奇失蹤兼留下遺書,惠敏父親林慶(王俊棠飾)將矛頭直指窮女婿湯文武(莫家淦飾)。湯文武與林慶事後先後請求宋世傑(王浩信飾)代打官司,林慶因開出高酬金500兩成功請得宋世傑做狀師,玲瓏(姚子羚飾)為此大為氣結。

姚子羚今次呢套劇真係超乎想像,佢受訪時話之後仲有更多驚喜。金剛個忍笑樣都好正。

另一名狀楊鳴(趙永洪飾)殺出,以幫湯文武為名喺公堂上處處與宋世傑對著幹,宋世傑之後就案件展開深入調查,其間竟然撞到疑似已變成水鬼嘅林惠玲,事件相當耐人尋味。

姚子羚演繹想打人,但又要死忍唔想離婚嘅樣。

姚子羚噚晚表現異常搶焦,將美女包袱全然拋開。由於婚後宋世傑留難,玲瓏為保「宋太」之名,不斷要遊走發火、忍氣吞聲及扮嬌嗲之間,其間又因不齒宋世傑為錢打官司,一度嬲至「聲都拆埋」。除咗「情緒過山車」,子羚喜感大爆發,尤其遭小鳳(王子涵飾)「老點」化超醜妝出巡。由於玲瓏唔知道妝容出事,每當遇到有男子經過即大拋媚眼;自以為靚爆鏡相當爆笑;此事成為宋世傑日後反擊楊鳴嘅重要供詞。雖然子羚喺劇中一再「自毁」靚樣,黐完鬚再化醜妝,仍然無損網民對其喜愛。

宋世傑與另一名狀楊鳴(趙永洪飾)在公堂上傑對著幹…宋世傑之後就案件展開深入調查。 鄧伊婷飾演嘅富家千金離奇失蹤,而佢喺坊間嘅評語竟然係好壞參半,到底 佢係受害者定係加害者?

談到玲瓏角色多變化,子羚坦言好Enjoy:「有時要扮男人、有時要好麻甩、又要化醜妝、有時好惡死、有時又好嗲,亦有正經傷感戲要處理,仲有打戲,成日下一秒唔同樣,表情或情緒上落要好大,我覺得幾正,最開心係畀我好豁出去咁做,無論係喊戲或搞笑戲,全部我可以好放去做。」

單係第一個星期,姚子羚已經大送驚喜,除咗黐鬚,仲有展現美背。

談到有網民拿其飾演玲瓏與郭藹明比較,子羚坦言事前準備時有睇過郭藹明及梅艷芳飾演嘅玲瓏,只係最後決定跟劇本演:「因為劇本都寫好咗故事同人設,我主要係跟故事走,同埋現場同導演子聰商量,佢哋有個共通點,就係都係好率直同簡單嘅人,佢只有一樣嘢,就係好愛宋世傑,佢嘅出現就係要保護宋世傑,我主要係攞住呢個點去演自己喜歡嘅玲瓏。」

林子聰親解圓面消瘦之謎。

子羚噚晚另一幕與王浩信及林子聰齊齊食花生一幕亦相當爆笑,三人全程更是默 契十足。為《狀王之王》身兼三職(總導演、編審及演員)的林子聰,獲眼利網 民發現在劇中清減不少,招牌圓面失蹤,不過子聰事後受訪時透露並非刻意減 肥,只是「忙到瘦」:「首先要度劇本、寫劇本同臨場改劇本,要同演員排戲, 如果自己有份埋位就要即刻化妝同換衫埋位,一邊拍一邊要睇playback睇吓得唔得。拍完夜晚就算返到屋企都未必瞓到覺,要諗第二日拍嘅嘢或者再之後嘅安排係點,真係周身都唔得閒。」

「水鬼」惠敏驚現第五集結尾,到底成件事嘅內情係乜?

《狀王之王》周一至五晚九點半翡翠台播映

狀王之王|三娘文凱玲自白戲演技爆發 字字鏗鏘鬧盡天下賤男人

新劇《狀王之王》1號晚播出嘅一集,終於解開咗「蜘蛛精殺人案」嘅謎底,經宋世傑(王浩信飾)鍥而不捨追查,終於發現倚春閣地下暗藏密室,仲囚禁咗一大班身負重傷嘅男人。原來倚春閣老闆娘葉三娘(文凱玲飾)係幕後黑手,三娘被宋世傑踢爆後爽快地自首,仲喺公堂上激動自白。貧苦人家出身嘅三娘有著相當悲慘嘅過去,年青時一再受到唔同男人欺壓同蹂躪,因而對男人恨之入骨,而對於其殺死及奪去子孫根嘅男人,三娘全數覺得死有餘辜。最終被判死刑嘅三娘,決定喺獄中上吊自殺了結一生…
文凱玲嘅眼神好有戲。
三娘表面睇嚟係手段兇殘嘅連環殺手,實質為人相當重情,對於真心真意對待自己嘅玲瓏(姚子羚飾),三娘痛錫有加,除咗一直將玲瓏送贈嘅手帕帶喺身上,自首前仲淚眼望向玲瓏;即使佢恨透男人,對於守禮節嘅宋世傑,三娘仍然手下留情,絕對唔係窮凶極惡嘅大奸角。噚晚文凱玲再度演技大爆發,尤其講到「天下男兒皆下賤」、「點解我唔可以糟躓返你哋呀」、「有冇諗過啲死咗嘅男人點解會冇咗下蔭呀?」、「我為咗姊妹幸福,多殺幾個壞男人又何妨」時,咬牙切齒嘅狠樣、輕佻再配以憤怒爆燈嘅眼神,令人完全代入三娘嘅情緒;而為咗突顯三娘自覺無做錯嘅狀態,Connie仲數度流露不屑高傲眼神兼喪心病狂大笑,心寒指數爆燈。除咗自白場口,Connie拎著紅元丹玩弄男受害者時,不但樣子狠毒、額頭仲激動至青筋暴現,足見Connie相當入戲。
文凱玲喺呢場戲演技大爆發。
講到三娘呢個角色,Connie自己都好鍾意,皆因滿足咗佢兩大願望:「三娘雖然只係單元主角,出場時間比較短,但同時滿足咗我想演古裝同埋連環殺手嘅願望。其實我細個開始就鍾意睇古裝劇,第一次主演嘅電影都係古裝。」古裝造型贏盡好評,被讚「宜古宜今」兼「好有味道」,Connie謙虛話:「多謝網民嘅讚賞,今次有三個造型,主要嗰套粉紅色衫劇組好用心,係特別手工訂製。髮型嘅話其實大部份都係我自己真嘅頭髮,唔使戴假髮比較輕鬆。其實拍《狀王》之前我啱啱拍完《一舞傾城》,當時成個頭電攣晒,為咗拍《狀王》又拉返直,好彩啲頭髮仲頂得順。」
展示背脊疤痕。Connie話拍呢場戲準備咗好長時間。
提及喺公堂上展示背脊疤痕嘅一幕,由於疤痕佔據位置頗多,Connie坦言準備時間頗長,仲話拍攝展示疤痕場口難度極高:「當日提早咗好多去現場整背脊嘅疤痕,拍嗰陣因為手上有鐵鏈,加上古裝衫嘅扣好難解開,大家都要一齊研究咗一陣,先成功配合做到一氣呵成拉開件囚衣嘅鏡頭。」至於拍《狀王》另一難度,Connie就話係忍笑:「最難係大家好搞笑嘅時候,我唔可以笑,仲要特別正經。例如宋世傑同阿九扮女人時,我要演睇唔出、好認真咁覺得佢哋好可憐。」

《狀王之王》星期一至五 21:30 翡翠台

金剛同王浩信反串扮女人,令文凱玲好難忍笑。

 相關推薦

熱門搜尋