StarTalk一氣呵成版丨黃婉君出歌勾起2R回憶 獲妹妹鼓勵執筆寫書

StarTalk一氣呵成版丨黃婉君出歌勾起2R回憶 獲妹妹鼓勵執筆寫書

Rosanne黃婉君作客《StarTalk》接受主持許文軒訪問暢談新歌,相隔18年再出新歌,Rosanne話最初都感覺有啲驚,當被人問到對上一次幾時出歌時,自己數一數原來已經係2006年,而今次出歌佢形容係順其自然,因為接拍咗個韓國代言人洗頭水廣告,所以同時推出一首跳唱快歌嚟個突破。

今次新歌叫做《帥起來》,同新晉填詞人張楚翹合作,Rosanne指對方寫過好多出色作品,而今次收到首歌就經已心郁郁,兼且講到佢心底想表達嘅嘢,Rosanne又認為不論男女都可以帥起來,經歷過由女兒、太太、媽咪等唔同角色,佢好想藉住新歌鼓勵一眾媽媽級嘅女性都可以活得精彩。加上Rosanne留意到現時組合都以唱跳為主,所以萌起新歌挑戰跳唱曲風。

首次挑戰跳舞,Rosanne話只要能夠跳到唱到已經好滿足,暫時仍然係排舞階段,兩者仲未可以同時做到。再次踏入錄音室錄歌,Rosanne用咗三個月時間由監製去鍛鍊返佢把聲同歌唱技巧,經過呢段時間嘅學習,Rosanne都話錄音進度都比預期快,三個鐘已經完成。錄音時候都有勾起Rosanne以往錄音同拍MV時嘅開心片段,佢都話自己好掛住以往跑宣傳,喺七人車入面換衫同食飯嘅時間,每次喺活動現場跟粉絲見面。

2R就嚟出道21周年,Rosanne透露以往都有主辦洽談佢哋開騷,不過兩姊妹都要兼顧家庭事業,較難抽時間做騷。其實佢哋不時都會收到粉絲私訊詢問幾時合體,佢都承認好對唔住班粉絲,因為2R隱退後專注生活,甚少同粉絲互動,所以希望新歌可以當作禮物送畀粉絲,佢又講到現時唱歌嘅心態都希望長做長有,因為本身好鍾意唱歌。

Rosanne現時除咗照顧家庭,又有經營牙科診所生意,而家再復出幕前唱歌,日常生活都非常之忙,Rosanne就話襯仔仔朝七晚四返學期間,佢就返工同學跳舞,除此之外,佢仲透露而家仲寫梗一本關於小朋友嘅書,而寫書係被妹妹啟發嘅,Race話佢有好多湊小朋友嘅法寶,因為兩個仔仔自細都食好多蔬菜,無病痛同無睇過醫生,不如將呢啲方法去同大家分享,Rosanne話秘訣係要由BB階段做起。即使全日都停有嘢做,佢話而家好享受呢種忙碌嘅生活。

StarTalk一氣呵成版丨甄濟如稱不擅於表達自己 7歲時曾創作暗黑歌曲

甄濟如Jasmine唔只係「宇宙最強」甄子丹嘅愛女,佢仲係2023年嘅樂壇新人,同時亦係一名唱作歌手。呢日佢就上到嚟TVB娛樂新聞台節目《StarTalk》,同主播 許文軒 傾下佢嘅音樂夢。

Jasmine表示自己係一個唔擅於表達嘅人,細細個就開始寫日記,但寫寫下變成創作音樂。7歲時創作咗人生第一首歌《This is not the wrold》,Jasmine話當時唔知自己點解會寫一首咁sad嘅歌,而之後就開始創作唔同嘅故事。

雖然細細個就已經創作歌曲,但Jasmine指當時並冇諗過做歌手,直到15歲嘅時候,自己開始有好大壓力,開始諗要做音樂定做藝術創作,當時因為自己好鍾意音樂,所以就決定咗行音樂路。

定好目標之後,Jasmine先美國伯克利音樂學院出發,佢話當時自己真係好想入呢間學校,所以就只報讀咗呢間學校,當時呢個決定令父母甄子丹同汪詩詩都有所質疑,當然最終都畀Jasmine考到啦。

講到音樂風格,Jasmine話自己好欣賞一啲女強人,好鍾意Beyoncé同梅艷芳,因為佢哋都畀到大家一種女強人嘅感覺。對於出道第一首歌《Forever19》,Jasmine指係因為一個朋友而創作。

 相關推薦

熱門搜尋