獨家直擊丨甜茶親民現身首爾首映禮 會場簽名合照全無托手踭

獨家直擊丨甜茶親民現身首爾首映禮 會場簽名合照全無托手踭

荷里活科幻電影《沙丘瀚戰2》喺韓國首爾舉行首映禮,我哋嘅主播王鎮泉就獨家直擊呢個盛大場面,會場吸引二千名粉絲一早塞滿場館,有甜茶之稱嘅影星Timothée Chalamet、Austin Butler同Zendaya盛裝出席,面對住在場粉絲嘅要求,不論係合照定係簽名,甜茶全部都有求必應,不過當佢步入場內,現場開始有啲混亂,期間有粉絲被推跌,需要保安護送離場。
 
事件無影響首映禮,甜茶繼續喺台上同粉絲互動,仲擺出韓式心心手勢畀大家影相。同場嘅Zendaya亦一樣咁親民同粉絲簽名合照,而Austin Butler同樣受大家歡迎,聽到現場有粉絲早一日到場霸位等候,佢哋都好感激大家支持。甜茶除咗喺台上多謝大家厚愛同支持,仲分享一個粉絲好期待嘅消息,就係希望大家好好欣賞續集,可能會有第三集同大家見面。Zendaya見到眼前企滿支持自己嘅粉絲,佢都話成個畫面好靚,好多謝大家嘅熱情歡迎同友善嘅接待。Austin Butler同樣感謝大家嘅熱情同等候。

熱門搜尋