婚後事｜陳自瑤放下女神包袱連環咆哮 羅子溢頹爆沉鬱夠傳神

新劇《婚後事》噚晚(26號)首播，一開場嘅幾段回憶戲已馬上入肉，明芯( 陳自瑤 飾)每年都會聯同女兒潘悅( 鄭淽月 飾)親手製作蛋糕為老公潘善仁( 羅子溢 飾)慶生， 幾年過去，「蛋糕慶生」依舊，但明芯已甜蜜不再，原來明芯同善仁嘅婚姻因欠債兼自私自利嘅老爺潘良( 煒烈 飾)、仲有善仁疑似出軌步向破裂，明芯為爭悅悅撫養權，不惜同善仁對簿公堂，更以極狠毒手法將善仁推向深淵…

《婚後事》首集就以倒鈙方式拍攝Yoyo同子溢嘅離婚官司
 
Yoyo呢次豁出去演繹自覺被背叛嘅暴走中女。除咗犧牲靚樣、以蓬頭垢面Look喺屋企憤怒為老爺執手尾、兼同善仁吵大鑊外；當發現疑似有外遇嘅善仁、撰寫講述婚外情小說《婚後事》抒發情感時，Yoyo以層遞式怒吼三次「我要離婚」，放盡喉嚨向善仁埋怨眼前一切「都係假架」，都充份演繹了一個曾經深愛過嘅女人喺被背叛後歇斯底里嘅狀態，令網民睇得心寒同時亦大讚Yoyo演技有進步，甚至覺得Yoyo有資格問鼎視后殊榮，更封佢做「御用癲婆2號」。

Yoyo嘅歇斯底里仲成為觀眾討論對象

而Yoyo喺首集結尾嘅心寒式「變臉」亦令網民毛管戙；原來善仁嘅反擊早在明芯計算之中，目的係要令善仁跌入「燒銀紙打官司」困境。歹毒嘅劇情反轉配以Yoyo陰森眼神、不屑奸險嘅「勝利笑容」，令網民驚歎故事「極端癲狂」，又期待今晚以明芯視點說故事嘅第二集。

甜蜜婚姻演變成無可挽回，記得繼續追故事發展喇
 
飾演「善仁」嘅子溢亦以極頹喪狀態演活備受離婚官司困擾嘅善仁。除咗全程懶理儀容，而面對狠妻步步進逼、生活逼人又無法同愛女見面。子溢將善仁壓抑又沉鬱嘅狀態演繹得相當到位，特別係佢雙眼佈滿紅筋、淚水時常喺眼眶打轉，獲觀眾大讚演技進步又傳神内斂。

婚姻有問題，小朋友最受苦

而一場父女整蛋糕戲，悅悅一句「想每年都可以為爸爸親手整蛋糕慶生」仲有二人相擁痛哭嘅畫面，亦感動唔少觀眾。

而子溢同囡囡嘅一場整蛋糕戲亦令唔少觀眾非常感觸

子溢同Yoyo亦落力喺社交平台宣傳新劇，Yoyo指：「一個我從影以來最難演繹的角色，一個我一看便愛上的劇本…..」，亦不忘叫大家追睇第二集嘅明芯視角；至於子溢就形容飾演「善仁」：「係一次突破自己局限嘅旅程！期待觀眾可以睇到不一樣嘅羅子溢。」

《婚後事》星期一至五晚 21:30 翡翠台