亞洲超星團｜LOONG 9成團出道引熱議 朱正延讚「遺珠」郭殿甲表現好

《亞洲超星團》決賽夜圓滿落幕，最終由奧利、李權哲、冼靖峰、江信熹、梁詩煜、白子奕、文佐匡、黃奕斌同陳梁九人成功出道，組成男團「LOONG 9」(音：LOONG  NINE)。作為超星召集人嘅曾志偉亦宣布，《亞洲超星團》將會展開第二季，LOONG 9更會出發到北京接受集訓，培養更深默契同才能。而香港有大型演出嘅時候，LOONG 9都會有表演舞台。

曾經都係選秀出道嘅超星導師朱正廷一路見證超星練習生成長，令佢感到印象最深刻嘅就係被一眾秀粉認定係「遺珠」無緣入團嘅郭殿甲，朱正廷更大讚郭殿甲喺決賽舞台表現非常亮眼出彩。至於另一位超星導師RAIN就話，好想同每一位練習生合作，亦有睇中想簽落自己旗下嘅練習生。

LOONG 9呢個團名一誕生就引起各界熱話，仲笑言團名正確讀音可以成為獎門人節目嘅問答問題之一添！對於呢個咁特別嘅團名，冼靖峰就有咁嘅睇法：「團名係代表9位成員，龍係12生肖中係好有意思嘅生肖。期望無論係團體定係未來嘅Solo活動中，大家都可以同龍一樣，騰龍飛躍。」

18歲嘅奧利以第一名出道，由第一集開始就一路係勢不可擋之勢跑出，實至名歸。不過佢就覺得自己喺決賽舞台嘅表現有有甩漏，雖然及時反應到，但就自責令表演變得未算得上好完美。

黃奕斌就透露其實呢晚抱恙上台，但唔希望俾大家佢發緊燒，將病成為拎到大家同情分嘅原因；至於被導師批評喺比賽時分心嘅文佐匡亦為自己解釋，只係當時太過興奮諗緊其他嘢，唔覺得自己喺比賽中有留任何遺憾。