視馬德鐘為救命恩人 薛家燕否認馬神走音

早前同 薛家燕 一齊去雲頂登台嘅 馬德鐘 ，呢日應邀為家燕姐主持嘅電台節目做嘉賓。貼心嘅馬神，仲帶埋保健品送比家燕姐，暖男指數爆晒燈。講起早前到雲頂登台，家燕姐就話因為當地嘅舞台樓梯又斜又高，加上自己著住一條長裙，所以落樓梯時真係一步一驚心。好彩有馬神同埋 陳展鵬 兩位男神傍住，否則佢話自己真係幾乎碌落樓梯呀，所以馬神絕對係自己嘅救命恩人呀。

馬神當晚以Deep V禮服登場，大騷胸肌，成為唔少人嘅焦點，不過亦有人將焦點集中喺馬神嘅唱功，對於佢唱歌時被指細聲又走音，家燕姐就話要幫馬神平反，因為馬神唱歌不嬲都好好，但當晚可能因為佢落台同觀眾握手時，影響咗收音效果，所以先會咁樣。

家燕姐仲話主辦單位好滿意佢哋嘅表現，仲約定嚟緊5月會再一齊去做騷，馬神都話好享受同家燕姐一齊登台，好似一家人咁開心呀。