歌神學友病癒重返舞台 台北站門票下周發售

歌神 張學友 正為佢嘅「60＋巡迴演唱會」於唔同城市巡迴，自去年起已經演出逾百場嘅學友，月初時因為感染新冠病毒而需要取消上海其中3場演出，不過事後亦宣佈向歌迷退票、火車機票甚至酒店亦統統補償，令歌迷雖然失望亦感到學友同主辦單位嘅誠意，仲被封為「完美偶像」。

早前因為感染新冠而取消部份演出嘅學友，處理手法備受讚賞

休息後病癒嘅學友日前已經重返舞台，繼續上海站演出，外界對佢嘅表現當然會非常注視，而學友亦以一貫極高品質完成證明自己已經完全康復。

今次巡迴暫時已經安排到8月，而5月底就會移師台北；睽違7年之後第5度於當地開騷，6場演出門票下星期起公開發售。

主辦單位宣佈，5月底台北站門票下星期公開發售

有歌神之稱嘅學友踏入歌壇逾40年，今次「60＋巡迴演唱會已經係佢入行以來第10次個人巡唱，早喺1995年的「友學友演唱會」演出已經有破百場紀錄，到2016年嘅「學友・經典演唱會」更寫下233嘅驚人場數紀錄。

雖然場次無人能及，不過學友就坦言從未將破紀錄當成開演唱會嘅目標，又指會盡自己所能做好每一場表演。學友又笑稱自己雖然不再年輕，不過對表演依然熱愛：「雖然年紀大咗，不過我相喺人生唔同階段都可以呈現唔同嘅美，做出適合自己年齡嘅精彩演出。」

學友認為雖然年紀漸長，不過深愛唱歌同表演嘅佢會繼續唱落去