StarTalk丨陳法拉產後首亮相急修身宣傳新戲 昔日《溏心》演啞女有助入戲

陳法拉日前宣布誕下細仔，佢極速瘦身投入工作，呢日接受TVB娛樂新聞台節目《StarTalk》訪問，為有份參演嘅荷里活電影《哥吉拉與金剛：新帝國》做宣傳，主播王鎮泉（Jeoffrey）第一時間恭喜法拉再度成為人母，法拉坦言早有計劃生第二胎。

法拉目前要急收身投入工作宣傳新戲兼準備出席首映，講到陀第二胎，法拉話整個人較淡定，控制到自己冇買好多新嘢，而阿仔外貌就似媽咪多啲，家姐出世嗰陣就似外國人樣多啲，大女更好心急買禮物去醫院探望弟弟。

法拉喺新戲飾演住喺地深嘅特別族群，屬高智慧人種，唔係太需要語言，主要以心靈感應去溝通，法拉全程零對白演出，佢昔日拍《溏心風暴之家好月圓》飾演阿慶呢個角色，演40集均用手語做戲，法拉坦言對今次入戲有助投入，因唔用語言去表達，整個人反而比較入戲。現居美國嘅法拉笑指早排好掛念香港美食，尤其想食魚蛋粉，亦好掛住用廣東話做戲，期待之後有機會參與香港製作！