李龍基酒樓登台搵錢養「妻」 林作帶裕美撐場獲讚靚仔

李龍基(基哥)嘅未婚妻王青霞(Chris)涉逾期居留同使用虛假文書等6項罪名目前仍還押懲教所，心情受重創嘅基哥近日重投工作，日前為麥明詩同盛勁為嘅圍村婚宴表演之後，呢晚又現身酒樓登台。

現場座無虛席，連林作都有帶埋女友裕美嚟捧場，見到被媽咪踩唔夠盛勁為靚仔嘅林作時，基哥仲公開唱反調話：「你靚仔好多。」氹到林作笑晒口。

基哥一連獻唱多首經典歌曲，全晚演出非常風騷，仲走落台獻唱同收利是，見到熱情歌迷仲主動索吻同獻吻搞搞氣氛，決意暫時忘憂。基哥事後指因為唔可以帶啲悲觀情緒畀觀眾，一場嚟到最緊要大家開心，發放正能量。暫時留港工作嘅基哥話只要有人邀請，佢都會去唱歌：「其一唱歌係我興趣，又可以搵錢養老婆養家。」

基哥受訪時多次避開關於未婚妻Chris嘅話題，佢話而家要專心工作，自己近日瘦咗十幾磅，連肚腩都消失，雖然胃口未受影響，但睡眠質素好差，活動前一晚只係瞓咗兩小時，不過佢就拒絕為失眠求醫，秉承自己醫自己嘅宗旨。