星光路上完整版｜ 子溢望憑《婚後事》突圍 與太太成首對視帝視后夫妻

羅子溢 憑早前播畢嘅話題劇《婚後事》當中演出，被唔少網民大讚終於有代表作。子溢早前作客《星光路上》同主播 潘盈慧 分享演藝路上嘅重要時刻。子溢原來當年誤打誤撞下，陪女友面試變成自己被簽入行。

又因為當年陽光大隻仔造型，不停接拍人地細佬嘅角色，子溢知道機會得來不易，無投訴盡力演繹，中間亦有一段外闖去影圈一試機會，更令佢虛心面對每次演出嘅機會：「我覺得香港嘅演員好犀利，好捱得好『襟撈』。拍戲時我多數唔係主角，所以都會把握機會爭取曝光時間，希望俾人覺得你好博而俾多個鏡頭，以前喺3、4米高跳落嚟覺得好易，依家會腳震，好容易拗柴。」

《婚後事》嘅演出唔止大獲觀眾好評，連佢家中嘅視后太太 楊茜堯 都讚好，不過見到子溢劇中分別同陳自瑤同王敏奕都有嘅激情戲份，茜堯反而有啲驚訝。原來子溢事前未有備案，覺得呢個係演員工作嘅一部分。面對太太嘅激情戲佢亦欣然接受，好似太太之前同張智霖喺《家族榮耀》嘅激咀戲份，子溢仲大讚太太識㨂對手。

被問有冇諗過今年憑劇集衝擊視帝寶座，子溢亦老實開口指攞獎，因為太太嘅劇集《黑色月光》好大機會會喺今年播出，所以佢都有幻想兩夫妻共同站上頒獎台創造歷史，但最後佢都有戴頭盔話，之後仲有好多勁劇會播出，希望觀眾到時記得自己有提名經已好好。