奔跑吧！勇敢的女人們｜煞科宴蕭正楠遭圍攻 Jinny Winki公認喜感滿分

由 蕭正楠 吳若希 賴慰玲 朱敏瀚 主演嘅劇集《奔跑吧！勇敢的女人們》呢日舉行煞科宴，場面熱鬧。劇集由開拍到煞科只係用咗70幾日，Edwin感嘆時光飛逝嘅同時，亦覺得呢段日子過得開心又難忘，佢話由於大家相處得好愉快，所以劇集咁快煞科，自己都好唔捨得，而最難忘嘅就係拍攝期間自己生日，劇組上下幫佢慶祝咗幾次生日，真係好有愛呀！
 
四位主演都係演得又識搞笑嘅高手，不過Edwin就被Winki同Jinny公認為最有喜劇細胞嘅人，Winki話同Edwin對戲成日都要焗蟹，無論Edwin做咩都充滿喜感，所以經常忍唔住NG。

處境劇《愛回家之開心速遞》一向緊貼潮流又創意十足，近日更大玩《新聞女王》主題，呢日 鄧智堅 呢個正版飛爺都有點評下戴耀明模仿「飛爺」嘅表現，智堅搞笑話戴耀明扮得唔夠似，原因係奶茶飲得唔夠多，不過佢就大讚愛回家劇組用心，無論佈景或者燈光都幾乎做到神還原。
 
煞科宴通常就應該要放開肚皮食餐飽，不過 唐嘉麟 就話自己要就住來食，原來佢因為要做身體檢查，所以飲咗瀉藥，佢仲搞笑話已經霸定個廁所，其他人不得內進呀！