StarTalk｜李佳錄歌前正視咬字問題 羅啟豪盼與王菀之合作

許文軒 主持嘅 《StarTalk》請嚟 羅啟豪 同埋 李佳 擔任嘉賓，佢哋上年參加《中年好聲音》後，等咗一年終於分別推出自己人生第一隻個人作品，佳佳推出新歌《心竅》，獲外籍老公大力支持，除咗周圍向身邊朋友分享之外，佢仲已經學識唱副歌部分添。佳佳平時講廣東話發音雖然唔多準，但係講到唱廣東歌，佳佳咬字就相當準確，事關佢話自己錄音前，都會花好多時間糾正咬字問題架。

至於Ramon嘅新歌《相信 相信》，製作班底相當強勁，由倫永亮作曲、周耀輝填詞。啟豪話由細到大聽歌都好留意作曲人，倫永亮一直喺佢好欣賞同尊敬嘅前輩，所以佢一直好希望有機會同Anthony合作，於是就放膽喺社交平台私訊佢，估唔到Anthony竟然一口答應，仲比咗唔少鼓勵佢，收到Anthony嘅Demo時，啟豪除咗覺得難以置信之外，更用「正爆」嚟形容。

而周耀輝亦係啟豪一直好欣賞嘅填詞人，啟豪話佢話咗比對方聽自己嘅故事，提到自己係一個好內歛嘅人，覺得自己困喺黑洞裡，而且覺得自己好無用，但自從參加咗《中年好聲音》後，就成個人脫胎換骨，所以啟豪話想藉住首歌鼓勵同自己有類似經歷嘅朋友。

至於將來啟豪就話好想有機會同王菀之合作，而佳佳就話好想推出爵士樂作品。