鄭伊健澳門騷勾觀眾集體回憶 率先爆陳光榮將開作品展

鄭伊健喺澳門舉行嘅演唱會全場爆滿，見到歌迷熱情嘅反應同應援燈海，令伊健相當興奮，唔只走到台邊同觀眾近距離互動，仲大派紀念品回饋歌迷。

演唱會上伊健介紹為佢製作多首歌曲嘅監製陳光榮時，就率先爆料指對方嚟緊將會舉行作品展，呼籲歌迷支持。呢晚伊健唱咗唔少經典歌曲，勾起全場歌迷嘅集體回憶，而堪稱大細路嘅伊健，喺演唱會尾聲時仍然活力十足，唱住動漫主題曲嘅佢仲興奮到喺台上不斷奔走，台下觀眾都睇到熱血沸騰。

而呢晚伊健嘅小師妹黃淑蔓就有份擔任嘉賓，佢事後話今次演唱會係自己出新歌後第一次參與嘅演唱會，黃淑蔓大讚伊健好貼心，喺佢唔知嘅情況下，幫佢決定埋喺演唱會方part加入佢獻唱新歌嘅環節。