黃美棋婚宴挑戰換8套衫嚇親老公 與Ray宣讀誓言感動爆喊

黃美棋同鍾健威（Ray）於4月6號拉埋天窗，結束12年愛情長跑，一對新人早上進行傳統敬茶儀式，晚上喺西貢一間酒店舉行婚宴筵開35席，美棋身穿低胸性感婚紗，盡顯玲瓏浮凸嘅好身材，更挑戰換8套衫嚇親老公。

美棋與Ray宣讀誓言感動爆喊，美棋好感恩遇到Ray，笑指之前冇諗過鍾意Ray呢類型嘅男仔，但係相處嘅時間令美棋感受到Ray給予嘅愛同真心包容；美棋為咗喺婚禮呈現最好嘅一面，又做瑜伽又紮肚努力修身，美棋開心稱目前23吋腰，一對新人坦言未必追龍B，希望生一、二個小朋友，生B方面都係隨緣。

一對新人喺圈中頗有人緣，黎瑞恩、劉溫馨、譚永浩、杜以辰、林秀怡、周志康、黃婉恩及曾淑雅等到賀，姊妹團成員之一嘅「大小姐」林淑敏話望住美棋出門已經眼濕濕，開心見證住美棋嫁得好幸福，大小姐亦大讚Ray好錫美棋。