福祿壽訓練學院丨蔡景行獲封獵鷹劉德華陳懿德幫郭珮文執生

阮兆祥、李思捷同王祖藍喺前晚（7日）播出嘅《福祿壽訓練學院》第二集，除咗聲仿出色嘅入圍者，仲有樣同原裝真係相似入圍者。J2er之一嘅蔡景行（行仔），以劉德華經典牛仔褸Look獻唱《十七歲》，聲線、眼神同表情均與年青時嘅華仔有點相像，祖藍看畢驚呼：「獵鷹劉德華！佢某啲眼神好似好年輕、十七歲嘅華仔！」結果行仔成功吸引祖藍及思捷進行爭奪。另一撞樣代表仲有綽號「筷子基」嘅陶大衛。

行仔又真係有啲年青時劉德華嘅影子。行仔用呢個Chok 樣回敬導師嘅讚賞，笑咗。

嚟自廣州嘅「行走的CD機」梁山山，佢為咗增加喜劇效果，自製氹女友橋段，兼同場加映「阮兆祥BB」同「噴水」情節，成為三燈選手！另一位「三燈得主」係「古巨軒」（周百恩），佢以古巨基同張敬軒腔獻唱《愛得太遲》同《春秋》，祥師兄指好少人模仿張敬軒：「我覺得呢個人物喺佢演繹底下，有影子喺度，《春秋》好難唱！」原來百恩同祥師兄甚有淵緣，祥師兄喺百恩為《獎門人》擔任禮儀先生時傳授唔少心得，不過百恩自責「學唔識」，為咗報恩亦為咗證明自己，佢最終選擇加入祥師兄隊：「我好想入祥師兄隊入面，去做一次佢想要我做嘅嘢！」

「筷子基」同助演「廣州陳奕迅」同樣搶鏡。「筷子基」最後揀咗入祥師兄隊，話因為覺得祥師兄同佢媽咪好似，個笑容！

除咗參賽者，獲封「迷女郎」嘅郭珮文（Juliana）以及「補鑊專員Just A 竹」陳懿德亦引爆熱議。以《鬼滅之刃》戀柱造型擔任「扮工室助理」嘅Juliana，連續兩集節目都好少發言，先後被祖藍同思捷點名要求「對話」。當思捷準備淘汰其中一位隊員時，佢故意話「都要啲唔識講嘢嘅Cue我」，可惜被暗示接話嘅Juliana未能接上，思捷只能笑言「佢堅持唔問喎。」德德見狀幫忙打圓場之餘，亦嘗試提醒Juliana，幾經德德努力，Juliana終於「醒番」，嘗試cue返思捷淘汰流程，可惜未知係咪太過緊張，Juliana一時間不但講唔出思捷隊名，就連「班房」兩個字都講唔清楚，令思捷相當無奈。

周百恩一開「張敬軒聲」，思捷即刻露出滿意嘅笑容，網民讚百恩創咗先河。祥師兄對百恩讚不絕口，祖藍都畀佢驚艷到！百恩希望加入祥師兄隊，證明自己之餘亦答謝祥師兄昔日的教導，場面感人。呢個噴水梗，令祥師兄都撳埋燈掣加入搶人戰團。郭珮文變咗「迷女郎」，好彩全程有德德好心提醒同傍住。郭珮文因緊張開口夾著脷，場面搞笑到不得了。