福祿壽訓練學院丨陳懿德 郭珮文人肉獎座搶眼 貼身造型盡現女性美

每集都令觀眾有驚喜兼「估你唔到」嘅《福祿壽訓練學院》，嚟緊星期日(14號)晚舉行勞師動眾嘅頒獎禮篇。除咗3名導師同24名學員會傾盡所能、各施各法扮鬼扮馬，福祿壽仲會廣碌人情卡邀請大批好友嘉賓蒞臨助陣，今日(10號)首先曝光嘅助陣好友，係擔任大會司儀嘅林曉峰，其餘嘉賓陣容就會喺稍後新聞稿再作公布。

阿Lo將為今個星期嘅《訓練學院》擔任司儀

喺首集以「戀柱」同「Just a 竹」 造型引發唔少話題嘅兩位「扮工室助理」 郭珮文(Juliana)同 陳懿德 ，嚟到頒獎禮篇自然唔敢怠慢，除咗會以超亮麗晚禮服登場外，仲會扮演唔同風格嘅「人肉獎座」，又會無定向喺節目唔同環節「老是常出現」，以搞怪造型刺激觀眾眼球。

兩位「扮公室助理」則會化身人肉獎座現身

「人肉獎座」對於兩位助理主持嚟講繼續係好大挑戰，除咗因為連身衣造型難Carry之餘，由於佢哋要喺長達十幾個鐘嘅錄影過程中多番舉起雙手「扮獎」，對二人嚟講亦是體力挑戰！而喺第一、二集扮「碌竹」嘅德德，今集獲製作組貼心照顧幫佢度身訂造「金球假手背囊」，等德德肩頸可以休息，德德感動話：「製作組驚我個膊頭同條頸太攰，所以就為我設計咗呢隻假手，等我唔使將隻手舉足十幾個鐘咁辛苦。但原來佢都幾重同幾掗拃，我頭先喺走廊都唔小心攻擊到幾個路人，工作人員笑我係『最強武器』。」講到一身造型，德德話單係為身上嘅金色菲林「定位」已經用咗兩小時。德德話著衫同除衫都好艱難：「除衫都要幾個人幫手，好似金蟬脫殼咁，著嘅時候又係四、五個服裝姐姐一齊出力、幫我將件衫轉轉轉番上去。」

德德獲道具組特製背囊

至於Juliana嘅造型，單係臉上金色部分都要先後兩次上色，耗時亦要兩個鐘。Juliana嘅超級貼身造型同樣蝦人著，Juliana話：「放棄咗節食架喇，有肚腩都唔緊要啦。我冇特別打底呀，因為呢件衫好薄，打底嘅話會好明顯。呢件衫去廁所要成套除晒，同埋自己一個係拉唔番件衫上去嘅。」除咗造型惡搞，Juliana喺頒獎禮篇嘅任務亦十分惡搞，為咗配合節目錄影同效果，佢需要十幾個鐘持續舉著一個「金電視」，雖然「金電視」係由發泡膠打造，但要長時間舉起亦相當考驗體力及臂力，現場所見，Juliana每逢嗌cut，都必定會一臉辛苦地放下「金電視」回氣，但一Roll機亦馬上入戲展現笑容。

Juliana嘅金人化妝都要唔少時間

《福祿壽訓練學院》 頒獎禮篇 星期日晚 20:00  翡翠台