獨家｜沈宗賢首次在港搞見面會 介紹顏志恒出場鬧出笑話

《中年好聲音2》嘅大馬過江龍沈宗賢(Sean)，喺參加比賽後吸納唔少粉絲，為咗答謝歌迷，呢日佢舉行香港首個粉絲見面會，肥媽Maria Cordero、韋綺珊，仲有幾年前喺歌唱比賽已經相識嘅顏志恒(Benson)同埋丁文俊都有到場支持，Sean更唱出連串歌曲滿足粉絲。

得到咁多粉絲愛鍚，Sean覺得係一個bonus，仲話：「當初嚟香港純粹係比賽，冇諗過一直過五關斬六將近8個月，會累積咗一班好愛鍚我嘅粉絲，比賽後佢哋都問我幾時可以搞見面會，能夠成功舉辦已經好激動。」Sean仲講笑話粉絲最關心佢嘅竟然係感情狀況，經常都問佢單身咁耐，會唔會想喺香港結識女朋友？Sean對此表示順其自然，想先做好音樂。

Sean更邀請Benson上台一齊合唱，不過自認廣東話麻麻嘅Sean，喺介紹Benson出場時，就鬧出個大笑話，錯誤講成「相信現場冇一位認識Benson」，台下嘅粉絲立刻糾正，「我哋個個都識Benson。」Sean即尷尬致歉，好彩Benson亦理解。

Benson雖然自身工作及演藝圈兩邊忙，但點忙都唔會忘記屋企兩隻化骨龍，早前就趁復活節假，一家人北上盡情叉電，無論自己幾辛苦都好，只要一家人一齊Benson就覺得係最歡樂嘅時刻。