蘇志威巡唱慈善兩不誤 JW王灝兒榮升業主樂談雪卵

蘇志威、JW王灝兒、區瑞強呢晚現身一個慈善晚宴擔任表演嘉賓，獲任命成為大使嘅蘇志威心情興奮，亦透露同慈濟組織主席相識多年，好榮幸得對方邀請成為大使。雖然草蜢將會到世界各地進行巡迴演唱會，但係蘇志威仍然會將工作同慈善事務同時兼顧。

由《亞洲超星團》選出嘅男團LOONG 9接連有人事變動加入新成員，更拆分兩隊進行活動，但近日前往內地集訓嘅成員就少咗香港三子冼靖峰、黃奕斌、文佐匡，令三子嘅粉絲都覺得好可惜。雖然蘇志威喺超星決賽後已經完成導師任務，亦唔清楚LOONG 9集訓嘅事，但佢亦大讚超星練習生個個質素好，祝成功出道嘅LOONG 9同其餘練習生前途無可限量。

榮升做業主嘅JW現身晚宴時神采飛揚，難掩喜悅心情，不過佢都話置業後要慳啲，唔可以再亂用錢。但係JW置業又雪卵，都令大家猜測佢係咪有計劃要同男友組織家庭，JW就解釋，呢個物業係想屬於自己一個人嘅。會做雪卵手術，只係認為呢樣嘢對自己而言多一層保障。JW亦覺得自己好好彩，喺打排卵針嘅十日都冇影響心情，好順利完成手術。