StarTalk丨古淖文奪冠接受甄妮評論 被指與肥媽撞樣得啖笑

今集《StarTalk》 許文軒 就請嚟《中年好聲音2》嘅冠軍得主古淖文做嘉賓，對於古淖文獲獎，雖然未必得到所有人認同，但係佢就一啲都唔介意，因為佢認為每個人都有自己嘅喜好，加上佢同班戰友感情非常好，大家都係良性競爭，所以無論邊個攞冠軍都值得開心。

講到前輩甄妮對佢嘅評論，認為佢比較老練，感覺較油膩，古淖文就話甄妮姐姐一語中的指出佢嘅問題所在，佢反而好感激對方畀佢意見去改善，古淖文自己會不斷努力慢慢去減除陣江湖味，所以佢話而定開始聽返比較新啲嘅歌，參考下冼靖峰嘅舞技以及年青一輩演繹歌曲嘅作風。

古淖文話總決賽前三日，有機會參與陳淑芬生日會，其中一位座上客就係甄妮姐姐，所以佢都有機會同對方打聲招呼，佢仲話如果仲有機會同對方碰面，都想把握機會問下佢一啲增進自己嘅方法。

另外一位不得不提嘅前輩就當然係肥媽啦，講到佢同肥媽嘅關係，古淖文話佢哋面對面無所不談，無咩私訊，好直接交談，就算比賽呢八個月，古淖文都未有向肥媽詢問意見，因為基於肥媽係評判，而自己係參賽者，所以大家都應保持一定距離，仲話肥媽對各參賽者係一視同仁。至於講到自己個樣同肥媽有幾分相似，古淖文就話係得啖笑，佢話大家都係澳門人，又係混血兒，所以拼湊在一起就感覺好似，不過古淖文就話唔覺得自己好似，仲大讚肥媽靚好多添。