陳豪拍新劇《執法者們》過53歲生日 宣萱Bosco突擊送蛋糕賀壽

近日正拍攝新劇《執法者們》嘅 陳豪 星期二度過53歲生日，劇中拍檔 宣萱 同 黃宗澤 仲有高層 樂易玲 突擊送上兩個生日蛋糕為佢驚喜慶祝，Jessica仲係由另一場地趕到現場，認真唔話得呀。

而壽星阿Mo就話已經多年未試過生日要開工，仲有大家為佢慶祝，所以非常感謝大家嘅心意。而Bosco同Jessica就話過往每年都會喺通訊群組祝賀，今次有機會一齊開工，就梗係要當面為老友送上祝福咁話喇。

一直係圈中出名好男人嘅阿Mo，開工前就已經同太太仲有小朋友一齊慶祝，仔女合奏又有親手造嘅禮物，阿Mo提起都非常甜呀。問到生日願望時，阿Mo就話希望經濟盡快復甦，大家都平平安安，仲話家人平安自己就會唔使擔憂，自然大家都開心咁話呀。