馬貫東自認魔音怕嚇窒粉絲 張振朗興奮網上曬新車

張振朗 龔嘉欣 劉佩玥 馬貫東 呢日現身機場準備出發到加拿大會粉絲，呢次佢地會到多倫多同溫哥華兩個城市同當地影迷見面兼唱下歌仔。問到到時會唱啲咩歌時，振朗幽默表示安排咗《萬水千山總是情》俾另外三位唱，而阿東就自認係魔音高手，自己要好努力唱先唱到啱音，所以好驚魔音會嚇到大家。
 
雖然四人呢次行程緊湊，但佢地都希望可以把握時間飲飲食食同埋影靚相，嘉欣仲大讚阿東影相好靚添！之但係講到興起時，振朗突然問咗句：「你地有冇人帶相機啊？」眾人先發現冇人記得拎相機，嘉欣更話：「點解你地唔叫我帶？我以為你地會帶。」非常好笑！最後阿Moon就話：「去到當地或者入到禁區喺免稅店買一部。」
 
作為電單車發燒友嘅振朗早前拎到新車，興奮得急不及待喺網上出Post大曬新歡。但估唔到係，振朗自爆自己沉迷揸新車，仲有過放棄去加拿大嘅想法，不過最後覺得要事業為重，所以決定乖乖出trip。