Grand住去台北｜翠如C君阿Jar豪遊台北 嘆米芝蓮Glamping上機巧遇Do姐

全新綜藝節目《Grand住去台北》， 由今晚（20 日）開始，一連兩個星期六晚播出。拍攝旅遊節目經驗豐富嘅 黃翠如 同 周奕瑋 ，首次同 C君 一齊擔任主持，以搞笑互寸方式，帶領觀眾體驗香港人最愛旅遊熱點台北嘅不一樣豪華體驗，仲首度體驗包機外遊滋味。

以介紹衣食住行豪華新體驗為宗旨嘅《Grand住去台北》，今晚第一集就會介紹三大特色豪華行程，好似連續6年獲得米芝蓮一星嘅當代料理餐廳、五星級豪華露營車之旅，仲有充滿藝術氣息兼有無限打卡位嘅新興精品商場。

翠如、阿Jar同C君一抵步就會嘆港人主廚打理嘅米芝蓮餐廳

其中嘅米芝蓮一星餐廳，除咗有只需約970港元嘅8道特色料理CP值之最，每道菜選用材料亦非常有特色，好似有紫色海膽汁、台灣地道蔥油餅，仲有檳榔入饌等。其中一味石班魚更令三隻搗蛋鬼玩個不停。

8道菜加埋都唔使1000蚊，難怪阿Jar同翠如都直比晒Like喇

嘆完珍味大餐之後，三位主持又同負責設計、主理菜式，來自香港嘅廚師Chef Kin傾偈。Kin 開心share喺台灣創立特色料理嘅過程，仲指特色係呈現「廚師本身嘅故事同心路歷程」，點知C君聽到就感嘆搞笑話： 「我哋食咗你嘅人生。」

之後佢哋體驗露營車遠離繁囂，翠如Model上身跪求「攝影擔當」C君幫忙影靚靚寫真，Room tour時仲齊齊大玩床照沙龍，C君仲驚爆翠如係風水吉祥物：「黃翠如係風水物，佢喺任何地方啲風水都好好多架！」

之後佢哋又會去Glamping，到郊外放鬆吓

之後佢哋去到精品商場搵 目，翠如獨自到訪一間文青風書店尋寶，仲大爆自己出Trip怪癖：「我去到唔同國家都會買一本書，仲要買當地嘅語言，所以喺唔同國家買嘅書，我全部都係睇唔明，但我就係鍾意擺喺度。例如我有本德文書、一本非洲雜誌。雜誌係我好鍾意買嘅嘢，因為可以睇到當地人嘅生活。」

翠如仲分享自己每到一個外地都會買當地語文刊印嘅書籍留念

其實佢哋出發之前，喺香港機場已有趣事發生，偶遇一位叫DoDo嘅靚女地勤人員，DoDo仲配合幾位無聊主持爆肚「角色扮演」，集齊美貌與喜感，令呢次旅程正式未出發先興奮。

幾個百厭主持出發前巧遇地勤「Do姐」，少不免又多嘴搞事喇

《Grand住去台北》今晚起 一連兩個星期六晚 21:00 翡翠台