周奕瑋人生首次買樓 7位數上車做日本業主

日本通 周奕瑋Jarvis 唔單止經常走訪日本實地拍節目，從今開始Jarvis喺日本仲會多咗個身份，佢喺社交平台開心宣佈自己買咗人生第一層樓，而選址就係港人同遊客至愛嘅熱門地大阪，正式宣告成為日本業主，恭喜恭喜！

Jarvis透過語音接受TVB娛樂新聞台採訪，表示最主要係早前拍攝節目《買大阪樓15識》時，喺當地結識咗專業嘅投資逹人，加上近期日元兌換較低，認為係入巿好時機，而且預算住所一年365日都可以出租用作經營民宿，站於投資方面係個理想選擇。

不過買樓始終係個重大決定，Jarvis事先都有同屋企人商量，但就鬧出笑話：「屋企人都笑我，話人哋去旅行、去拍節目都係買手信，你就買咗層樓，但都支持我，始終咁大個仔係時候有啲投資作被動收入。」Jarvis順利上車做日本業主，面對未來嘅加重負擔，佢會努力搵錢幫補。至於樓價方面，Jarvis只肯透露係七位數字，首期就繳付咗六位數，係佢自己能力應付到嘅負擔，明年才正式收樓，佢都好期待見到自己嘅單位。

而Jarvis亦喺社交平台透露，今次喺大阪置業嘅決定，曾經同方健儀傾過，對方仲同話可以當成退休投資咁睇，Jarvis仲話以前去親日本係租對方間屋嚟住，但以後可以住自己間屋之餘，仲可以同對方做鄰居呀！