逆天奇案2丨69歲張雷演賊王半裸操肌 林夏薇緊身衫熱褲扮流鶯

《逆天奇案2》噚晚（22號）播出一集展開新個案「賊王逃獄案」，單元主角係相隔17年再亮相TVB劇集嘅張雷！劇情講述服刑廿多年嘅賊王石少波（張雷飾），竟然喺刑期最後一個月時逃獄，Nic Sir（黃智賢飾）喺調回CIB工作嘅阿Wing（林夏薇飾）協助下，發現少波藏身之所，可惜喺追捕過程中發生意外，被少波成功逃脫。今晚（23號）一集將會揭露賊王少波逃獄真相，結局更係令人意想不到。

喺劇集《神鵰俠侶》飾演「金輪法王」而為人熟悉嘅張雷，對上一次亮相TVB劇集已經係17年前嘅《蕭十一郎》。問到點解今次願意參與《逆天2》，張雷話：「監製同編審打電話畀我同我講故仔，我聽完之後覺得幾好玩，咁咪應承拍兩集囉！」問到有否戲癮？佢笑言：「其實出面一直都拍緊嘢，網劇、電影都有參與，梗係有戲癮啦，最好TVB搵多啲我拍劇！」

「金輪法王」張雷Fit爆演出《逆天2》令人眼前一亮鋼條身形真係不得之了

現年69歲嘅張雷武打演員出身，今次劇中有唔少騷Quali場面，分別係街頭追逐同半裸舉啞鈴晒爆肌場口，張雷笑言：「呢個角色真係啱晒我，又要有啲年紀，又要有啲動作戲，又要有文戲。」張雷平時都會Keep住做運動，多數喺黃昏時候做，會先跑幾公里做熱身，之後玩吓啞鈴、掌上壓、Sit Up咁練吓體能，有時亦會打吓沙包、打吓拳、打吓功夫咁，加加埋埋都差唔多2個鐘。食方面就都幾清淡，因為已經食咗幾十年齋。

林夏薇為追捕逃獄嘅張雷，多次變裝查案

噚晚一集，身為女主角嘅薇薇亦有亮眼演出。啱啱返到CIB工作嘅阿Wing久休復出積極投入工作，多番變裝落區「踩線」搜集情報，除咗化身眼鏡娘主婦外，仲以緊身上衣加熱褲上陣扮流鶯，大晒唔鹹唔淡廣東話，場面搞笑。

扮鬼扮馬出沒就係為查出張雷逃獄嘅原因

《逆天奇案2》逢星期一至五晚 20:30 翡翠台