Yoyo諾懿延續婚後事話題 賴慰玲飲醉拍節目中途嘔

話題劇《婚後事》收視口碑雙豐收，延續劇集嘅話題性，幾位主角包括黎諾懿、陳自瑤、賴慰玲同羅天宇就齊齊拍攝咗一個集合清談同真人騷嘅節目《香港婚後事》，同嘉賓一齊談討婚姻問題，當中包括恩愛夫妻豹哥豹嫂、吳若希、李承責師傅，同埋好少作客綜藝節目嘅龔慈恩等，而Yoyo嘅好姊妹連詩雅當然都走唔甩，不過準媽咪Shiga就好似被幾位主持嚇親，諾懿話有好多懷孕資訊同Shiga講，好似BB出世頭半年都比適辛苦，Winki就話生咗之無得瞓覺，應該係頭嗰六年都無覺好瞓，Yoyo話要講個事實畀Shiga聽，但佢聽完就好驚。

節目以露營型式錄影，諾懿同Yoyo都覺得呢個拍攝方法好新鮮，從來未試過露營嘅佢哋，仲話要約齊人帶埋小朋友去露營，享受家庭樂，但係Winki話有小朋友在場，大人就無得好自由傾吓偈，諾懿話早啲叫小朋友去瞓就得。Yoyo就話好似天宇咁講，平時工作完，大家都要返屋企，但係今次喺營地入面對足全日，彼此感情好似突飛猛進。

可能營地嘅氣氛太放鬆，連平時慶功都好少飲酒嘅Winki，有一晚喺酒吧拍攝時，加上現場氣氛好開心，佢都放鬆去飲吓酒，點知第二日起身後，拍攝咗幾位嘉賓就發現自己開始醉。諾懿話最奇怪係一朝早，唔知點解咁多嘢嘔出嚟，Winki都話自己一早知道會出事，所以袋定膠袋喺身，點知拍拍吓真係衝埋一邊嘔，佢話呢次好羞家。