聲夢1+2丨糖妹Phil坤哥Alan任壓軸嘉賓 張振朗大騷胸前隨意肌

綜藝節目《聲夢1+2》喺4月27號將會播出最後一集，嚟到壓軸一集，內容同嘉賓都會加碼，搵嚟糖妹、林奕匡、布志綸、吳業坤同張振朗做嘉賓，振朗呢位被演戲耽誤嘅歌手，會成為藍隊外援，仲同帶病上陣嘅潘靜文合唱，雖然無人留意到Sherman聲線有問題，不過佢都話自己失聲，天意要令佢哋讓賽，而事前佢亦無同隊友講過病咗。

坤哥成為紅隊外援，佢同振朗玩遊戲上嚟非常識得搞氣氛，振朗臨場仲多咗個花名叫「張震波」，鬼馬嘅振朗就話冇特別操肌，因為胸口嘅係隨意肌。坤哥就同李茵彤合唱，原來Desta係坤哥嘅小迷妹，仲情不自禁話「坤哥，我愛你。」

呢集亦有唔少精彩嘅合作，包括何晉樂、冼靖峰、侯雋熙聯同林沚羿以無伴奏合唱方式，跟林奕匡唱金曲《高山低谷》，阿Phil都大讚一班後輩好有心同準備十足，加上今次能夠同《聲夢》合作，感覺有新鮮感。

Alan作為《聲夢2》嘅導師，再見到班學員，佢都話大家成長咗唔少。糖妹就話成班畢業生喺舞台都無問題，而經過咗呢個節目，可以令大家發現佢哋更好玩同真性格一面。