孫佳君現身寄賣活動狀態大勇 透露正籌備自編自導自演新戲

由Jeremy 黃俊豪 同小花 譚杏藍 一齊搞嘅明星物品寄賣平台，呢日舉行Pop Up Store活動，好耐冇喺香港公開露面嘅孫佳君都有現身支持，呢日佢以白色西裝外套，內裡襯咗件黑色Deep V上衣，加上超短褲，睇上去狀態大勇，完全睇唔出今年九月就要步入50歲。孫佳君透露依家正忙於籌備自編自導自演嘅新戲，已經開始寫劇本，希望下年可以順利完成。

身為活動搞手嘅Jeremy就話，知道好多藝人朋友家中都有太多衣物，所以定期搞Pop Up Store可以幫大家斷捨離，佢仲大爆孫佳君寄賣嘅衣物有好多連吊牌都未拆添。

何浩文 呢日都有現身活動，佢話自己受到爸爸影響所以有儲物癖，尤其鍾意買襪，見到鍾意嘅款式會一次過買好多對。另外因為自己玩開攝影，所以都儲落唔少鏡頭，其中有新有二手，保守估計都已經有20個以上喇！