李琳琳親解息影33年復出拍戲因由 坦言無邀老公姜大衞幫手對戲

李琳琳接受好友薛家燕嘅訪問，老友聚舊當然係話題不絕啦，琳琳姐都有分享佢息影33年再出山拍戲嘅原因，佢話新作劇種好特別、角色可遇不可求，而且題材探討咗好多現實社會嘅問題，可以帶一啲訊息畀觀眾，所以吸引佢再次拍返戲。雖然呢次琳琳姐回歸幕前演出，但佢就話無特別引發咩戲癮，只係咁啱遇到自己喜歡嘅劇種同角色，所以一切都隨遇而安。

老公姜大衞啱啱奪得金像獎最佳男配角，不過琳琳姐就話無刻意揾老公一齊對戲，因為各自都習慣靜靜睇劇本，反而佢話兒子姜卓文，因為中文程度差少少，所以就有幫佢對下戲。

琳琳姐接受訪問當日，咁啱掛起紅雨，老公John哥都有做「柴可夫」車琳琳姐，真係廿四孝好老公呀，而嚟緊母親節將至，琳琳姐就話自己每日都好似過節一樣，所以無需要特別慶祝，不過佢相信仔女們都會有安排呀。