28歲抗癌勇士文頌男需接受11次電療 嗎啡份量越來越重以笑迎戰癌魔

J2台主持文頌男（Koba）去年10月確診患上罕見癌症「尤文氏肉瘤」（Ewing’s Sarcoma），全面停工及積極接受治療，惟病情反覆，Koba日前公開籌募醫藥費，盼能減少痛楚。 戴鴨舌帽及口罩嘅Koba噚日喺友人陪同下，接受電台節目訪問，撐住拐扙現身，Koba全程表現樂觀及笑容滿臉，以笑迎戰癌魔。 
文頌男在男友人陪同下(後排中間)接受節目訪問。

Koba指當得知自己患癌嗰陣冇咩特別感覺，反而十分冷靜，「因為未反應得切，返到屋企沉殿咗幾日，先越嚟越擔心同焦慮，又要諗點樣同公司、家人、朋友點樣交代。」 28歲Koba於單親家庭成長，12歲時父親有外遇離家，家庭頓失經濟支柱，又欠下好多債務，Koba透露自己童年過得十分反叛，經常逃學及不歸家流連街上，「渾渾噩噩過咗一年，突然醒覺唔可以再無所事事同生產力，當時只做外賣收入好少，覺得人生唔可以再係咁，跟住返咗學校讀書，直至大學畢業」。

文頌男去年10月確診患上罕見癌症「尤文氏肉瘤」。

Koba加盟J2台擔任主持一年便發現有惡性腫瘤，但佢堅持到行動不便才停工，「因為我真係好鍾意返工，唔想浪費每一次出鏡」，惟要面對龐大醫療費同生活支援，Koba日前喺IG公開籌務醫藥費，「剩係覆診做電療可能只係幾十或幾百元，最貴係照Ｘ光，因為公立醫院要等半年先有報告，去私家照要萬幾至二萬，仲要局部照，呢個係最大負擔，而家短期內要幾十萬先夠我維持幾個月嘅醫療費用。」譚玉瑛作出呼籲：「希望大家聽到之後，可以畀頌男多啲支持，令佢可以繼續做自己鍾意做嘅嘢。」 

Koba加盟J2台擔任主持一年便發現有惡性腫瘤，但佢堅持到行動不便才停工。

Koba完成5次做化療後卻未見好轉，形容當時心情像跌入深淵：「做化療好辛苦，自己變得好虛弱，好似徘徊生死邊緣，又甩晒頭髮，冇以前咁好睇，覺得做咁嘢都冇用嘅，我仲醫唔醫得好呢？我仲近死亡近咗一步，成個情緒好崩潰，但我都好快收拾到，過咗幾日就已經唔再諗呢樣嘢，係咁提醒自己至少仲可以見吓朋友，仲可以開心到，唔好諗自己過得幾咁困難。」 Koba開始治療至今近9個月，現在正做第17次電療，總共要做28次，「最辛苦係平躺做電療會好痛，第一次做電療時痛到呻吟，要用意志力忍住，做完副眼鏡濕晒，隻腳好似冇咗感覺，成個人震得好緊要，落床後跪喺出面十幾分先平復到。」

Koba完成5次做化療後卻未見好轉，形容當時心情像跌入深淵。

現階段Koba要靠吃止痛藥同嗎啡止痛，但嗎啡份量不但越嚟越多，而且並唔能完全止痛，令佢相當辛苦。不過Koba依然正能量滿滿，答謝一直支持佢嘅人，「感謝大眾可能唔認識我，但都好熱心傳訊息鼓勵同捐款，好多謝你哋」。
Koba開始治療至今近9個月，現在正做第17次電療，總共要做28次。