【名人健康/抑鬱症】現年61歲的著名遊戲節目《百萬富翁》主持及《我和殭屍有個約會》山本一夫的陳啟泰，早前接受資深傳媒人汪曼玲 YouTube 頻道《快拍．曼鏡頭》訪問，罕有坦白患上家族遺傳抑鬱症。疫情期間，他失眠到幾乎崩潰，要食精神科藥物先頂得住，更一度肥到接近200磅，仲諗過死，幸好靠太太無條件支持才渡過難關。
疫情斷內地工作 人生急跌入谷底
曾主持人氣遊戲節目《百萬富翁》的陳啟泰，近十幾年九成工作都在內地發展。疫情一來，幾乎完全冇得返大陸開工，工作突然停擺，只能長時間困在香港屋企，形容自己「冇嘢做、人生跌入低潮」。
家族遺傳＋多年失眠 抑鬱症全面爆發
佢一直以為自己身體好健康，點知原來家族早就埋下「精神科炸彈」——媽媽同兄弟多年前已出現嚴重失眠、抑鬱問題。
他坦言失眠問題已超過20年，不過以前尚算「瞓得差」，但疫情來襲、停工停社交、長期困在家中，令失眠迅速惡化，連短暫入睡都變成奢侈。
佢自覺問題同基因有關：「我讀過課程，如果基因入面有抑鬱傾向，無論你幾健康，都有機會喺某啲時候爆發。」最終由「只係瞓得差」變成真正的嚴重抑鬱症患者。
疫情期間驚入隔離營 寧死不睇醫生
病情最嚴重時，陳啟泰幾乎完全瞓唔著，食安眠藥也無效。當時正值本港每日幾萬宗確診，他坦言最驚嘅唔係中招，而係「中咗被捉去隔離」。
佢話如果「中招」要入隔離中心，環境陌生、身邊無熟人，加上安眠藥無效，「一定癲晒」，呢份恐懼令佢一度唔敢出街睇醫生，寧願困喺屋企死頂。
除咗失眠，佢仲出現強烈身體不適：心裏面寒到出晒嚟，著幾多衫、24小時開暖氣都無助。連輕微地震、負面新聞都足以觸發恐慌，令佢幻想世界末日隨時來臨：「見到天氣報告話凍十日，我真係諗會死。」他形容那段時間係最接近死亡。
太太停工半年 24小時守喺身邊
當抑鬱症最嚴重時，陳啟泰形容自己「個人係壞咗、冇晒安全感」，一個人喺屋企會驚到癲。太太停工變成全職「照顧者」，足足陪伴咗佢七、八個月，幾乎24小時留喺屋企，只係偶爾落街買餸。
佢甚至直言連沖涼半小時，太太不在身邊都會感到極度不安，顯示當時對太太依賴有幾嚴重。
服精神科藥物 體重曾暴漲至200磅
家庭醫生開安眠藥無效、情緒愈來愈低落，他最終去睇精神科醫生，接受針對抑鬱同焦慮的治療。他表示每日要靠六、七粒精神科藥物先可以勉強瞓到。
病情反覆，因為嚴重失眠同食慾不振，他最初由170幾磅跌到150幾磅，及後精神科藥物副作用出現，體重又由150磅暴漲至近200磅。
靠信仰、排毒調理＋狂做運動 成功大幅減藥
陳啟泰跟太太返教會，明白到：「順主令我知道，呢個只係一個病，腦細胞『發炎』啫，要認真處理。」又形容抑鬱症就好似其他病一樣：「你個腦壞咗，就要食藥去醫。」
一年前左右，他靠排毒及調理方式，配合醫生指示，慢慢減少精神科藥物份量。到最近半年，佢已經可以只靠少量助眠藥物維持每晚4至6小時睡眠，多數日子都唔需要食精神科藥。
曾經諗過死 但最放唔低係太太
陳啟泰承認，抑鬱最嚴重時曾經諗過死亡：「望住出面條樓，都幻想過如果跳落去會點。」但一想到太太，覺得她年紀還輕，如果自己走咗，佢一個人要面對生活壓力同情緒傷痛，才懸崖勒馬。佢形容太太係「聖人」，亦係唯一真正幫到佢走出深淵嘅人。
佢亦發現身邊人都「中過」抑鬱，感慨社會上「好多好多」人都有情緒病，只係好多人選擇收埋唔講。他提醒懷疑自己患抑鬱症，唔好匿埋，因為抑鬱症可以治療，亦有機會完全停藥（不過他強調是自身經歷，未必適合所有患者）。
【延伸閱讀】
大腸癌｜日本樂隊LUNA SEA鼓手真矢病逝 抗大腸癌6年 50歲高發 即睇大腸癌早期徵狀/致癌習慣
痛失仁醫 | 中大醫院骨科仁醫黃詠儀離世 曾加入「無國界醫生」赴阿富汗救援 病人不捨湧帖文悼念
長壽秘訣 | 94歲胡楓入行70年不言休 6大長壽養生秘招 不吃補品起床後必做一件事防中風
57歲「御用爛仔」游飈腦出血離世 《大時代》一人分飾三角最經典轉職去甲醛 腦出血4大先兆