澳洲潮什麼｜熱氣球高飛後執拾避牛屎 Christy爬廿層高大橋腳都震

梁芷珮主持嘅《澳洲潮什麼》嚟緊就會播出最後三集，今個星期Christy分別會同樹熊近距離接觸，坐熱氣球同滑浪，全部都係佢第一次新鮮體驗。

講到第一次登上熱氣球嘅體驗，Christy就狂讚為時60分鐘嘅旅程非常舒服：「慢慢睇住日出，好和暖、好舒服，好難得同個太陽咁近距離。」雖然體驗熱氣球費用逾2000港元，不過由於熱氣球嘅球囊傘蓋太大，顧客乘搭後都要幫忙收拾。有份參與嘅Christy就透露收拾過程一啲都唔簡單，不過都唔及要避開牛屎嘅高難度：「因為要走幾轉去擺好佢，但我覺得重唔係一個問題，最慘係要睇住啲牛屎，真係好多牛屎。」

Christy笑言坐熱氣球最深體驗除咗係日出美景之外，就係幫手收氣球時要同步避開牛屎地雷陣呀

除咗熱汽球之旅，Christy今次仲有其他高空體驗，好似爬20層樓高嘅橋同埋喺位於黃金海岸嘅SkyPoint歎high tea。爬橋當日，全副武裝嘅Christy同其他參加者先後爬橋登上有20層樓高嘅高處，Christy登頂時仲話雖然自己登高經驗豐富，不過一樣被處身嘅高度震懾：「我住60 幾樓，平時透過玻璃望落街，都有少少離心力，但嚟到呢個位成件事通透咗，我諗畏高嘅人真係會驚。」出名識歎嘅Christy，今個星期繼續會帶大家盡情吃喝，除咗晨咁早「未食早餐先飲啤酒」，又會體驗「殘廢野餐」，一個電話就解決，相當寫意。